Almatyda S. Begalınniń 115 jyldyǵyna arnalǵan zııatkerlik saıys ótti
ALMATY. 24 qarasha. QazAqparat /Erbol Turymbetov/ - Búgin Almatydaǵy Qazaqstan jazýshylary kitaphanasynda Saparǵalı Begalınniń 115 jyldyǵyna arnalǵan mektep oqýshylarynyń «Altyn qaqpa» zııatkerlik saıysy bolyp ótti.
Ony Qazaqstan Jazýshylar odaǵy men «Shuǵyla» demalys ortalyǵy birlese uıymdastyrdy. Sharanyń maqsaty oqýshylardy Saparǵalı Begalınniń shyǵarmashylyǵymen keńinen tanystyrý jáne zııatkerlik saıys arqyly oqýshylardyń bilimin shyńdaý, sondaı-aq jas qalamgerler shyǵarmashylyǵyn damytýǵa baǵyttalǵan.
Shara barysynda Almaty qalalyq №104 jáne №123 mektep oqýshylarynyń komandalary S. Begalın shyǵarmashylyǵy boıynsha saıysqa tústi. Nátıjesinde №123 mektep-gımnazııasynyń oqýshysy Bolat Razygúl jeńimpaz atandy. Atalmysh kitaphana meńgerýshisi Elena Aǵaısa tanymal aqyn-jazýshylardyń shyǵarmashylyǵyn kitaphananyń dástúrli túrde nasıhattap otyratynyn atap ótti. «S. Begalın balalar ádebıetiniń damýyna úles qosqan talantty jazýshy. Búginde kórnekti tulǵanyń 115 jyldyǵyn atap ótý maqsatynda osyndaı shara uıymdastyryp otyrmyz», - dedi ol.
Shara aıasynda S. Begalınniń ómiri men shyǵarmashylyǵyna arnalǵan «Balalardyń súıikti jazýshysy» atty kitap kórmesi usynyldy.
