Almatyda ruqsatsyz ótken mıtıngten bir adam qaza tapty, bir adam qamaýda
ALMATY. QazAqparat – Almatydaǵy ruqsat etilmegen mıtıng qaıǵyly jaǵdaımen aıaqtaldy. Joldyń jabylǵanyna narazy bolǵan er adam tóbeles kezinde qaza tapty, dep habarlaıdy QazAqparat tilshisi.
Almaty qalalyq polıtsııa departamentiniń málimetinshe, 11 maýsymda bir top azamat Gagarın kóshesiniń kólik júretin bóligin jaýyp tastaǵan.
«Ruqsat etilmegen aktsııaǵa qatysýshylardyń biri – 1980 jyly týǵan M. esimdi azamat. Janjal kezinde qozǵalysy bógelgen kólikterdiń biriniń júrgizýshisi 1974 jyly týǵan K. esimdi azamat jaraqattanǵan. Jábirlenýshi qaıtys boldy», - dep habarlady departamentten.
Vedomstvo taratqan aqparatqa sáıkes, 42 jastaǵy M. esimdi azamattyń is-áreketi QR QK-niń 106-baby 3-bóligi «abaısyzda ólimge ákep soqqan densaýlyqqa qasaqana aýyr zııan keltirý» boıynsha qaralyp jatyr.
«Ol ýaqytsha ustaý ızolıatoryna qamaldy, sotqa deıingi tergeý bastaldy. Kúdikti 8 jyldan 12 jylǵa deıin bas bostandyǵynan aıyrylýy múmkin», - dep atap ótti Almaty qalalyq polıtsııa departamentiniń baspasóz qyzmetinen.
Ruqsat etilmegen aktsııany Korolenko kóshesindegi úılerdiń biriniń turǵyndary uıymdastyrǵany anyqtaldy. Olar «2019 jyldan beri jańa turǵyn úı kesheniniń qurylysyna baılanysty kólikter kóbeıip ketti» degendi jeleý etip, aýlalaryn jol jıeginen qorshaýdy talap etken.
«Buǵan deıin bul úı turǵyndarynyń ótinishi boıynsha joldyń tórt jerinde jyldamdyqty shekteıtin kedergiler tóselip, Gagarın jáne Radostovtsa kóshelerine eki shlagbaým ornatylǵan bolatyn. Basqa mán-jaılar anyqtalyp jatyr», - dep qosty polıtsııadaǵylar.
