Almatyda ruqsatsyz aǵash keskender 40 tal otyrǵyzýǵa ýáde berdi
ALMATY. QazAqparat - Almatyda Arbat alańynda zańsyz aǵash keskender almatylyqtardan keshirim surady. Sonymen qatar, 4 aǵashtyń ornyna 40 aǵash otyrǵyzýǵa ýáde berdi, dep habarlaıdy qazAqparat tilshisi.
Jibek Joly, 104 ǵımaratynyń ákimgeri Jańabaı Jumabaev otalǵan 4 qaraǵashtyń ornyna 40 sapaly aǵash otyrǵyzýǵa ýáde berdi.
«Kesilgen 4 aǵashtyń ornyna 10 ese kóp, ıaǵnı 40 sapaly aǵash otyrǵyzýǵa ýáde beremiz. Ýaqyty - 1 tamyzǵa deıin. Taǵy da almatylyqtardan keshirim suraımyz. Almatynyń jasyl jelegin ornyna keltirýdi moınymyzǵa alamyz», - dedi atalǵan ǵımarattyń ákimgeri Jańabaı Jumabaev.
Óz sózinde ǵımarat ákimgeri aǵashtardyń ne sebepti kesilgenin aıtty.
«Sebebi, aǵash ǵımaratqa kedergi keltirdi. Olar eskirgen bolatyn. Butaqtar synyp, terezeni zaqymdady. Tez arada arnaıy qyzmet ókilderin shaqyryp, «tonırovka» degen ádispen qysqartqanbyz», - dedi ol.
Eske sala keteıik, búgin Jibek Joly, 104 mekenjaıyndaǵy ǵımarat ıesi 4 japyraqtuqymdas aǵashty zańsyz kesip tastaǵanyn habarlaǵan bolatynbyz.
Qalalyq polıtsııa Arbat alańyndaǵy aǵashtardy zańsyz keskenderdi ustaǵan edi.
Polıtsııaǵa bergen jaýabynda jumysshylar ǵımarat ıesiniń "aǵash kesýge ruqsat qaǵazy bar" dep aldaǵanyn aıtqan.
«Ǵımarat ıesi shetelde bolǵandyqtan, onyń qaladaǵy ókili ustaldy. Endi oǵan qatysty ákimshilik shara qoldanylyp jatyr», - dedi ákimdikten.
