Almatyda ruqsat etilmegen tyńdaýǵa arnalǵan quraldy satý áreketi ústinde turǵylyqty eki azamat ustaldy
ALMATY. Shildeniń 8-i. QazAqparat - Almatyda ruqsat etilmegen tyńdaýǵa arnalǵan quraldy satý áreketi ústinde turǵylyqty eki azamat ustaldy, dep habarlaıdy Almaty qalalyq ІІD baspasóz qyzmeti.
«Negizinde, ózderiniń quqyqqa qarsy áreketterin iske asyrý úshin kúdiktiler 2010 jyldyń sáýirinde jahandyq Internet jelisi boıynsha elektrondyq jolaqtar arqyly qorektendirý blogymen «trekerli GSM» dep atalatyn tehnıkalyq quraldardy satyp alýdyń tıimdi jolyn tabý jóninde habarlandyrý bergen. Ary qaraı buǵan qyzyǵýshylyq bildirgen adamdarmen tapsyrys sommasymen kelisip, qurylǵynyń bir birligin 35 myń teńgege baǵalaǵan. Odan keıin taýar jetkizý merzimi men onyń shartyn pysyqtaıdy. Aldyn-ala tergeý barysynda anyqtalǵandaı, bul epshil satýshylar satyp alýshylarmen kózbe-kóz kezdesken»,- dep habarlady Almaty qalalyq ІІD Krımınaldyq polıtsııa basqarmasy «K» bóliminiń bastyǵy, polıtsııa maıory Aleksandr Nejınskıı.
Ózderiniń kezekti kelisimderin seziktiler óte tez arada aıaqtaýdy josparlaǵan. Klıentpen Tóle bı men Turǵut Ózal kósheleriniń qıylysynda kezdesýdi belgilegen. Kelisim boıynsha, satýshylar ózderimen birge bes tyńdaý quralyn ala kelgen. Taýar somasynyń barlyǵyn - 175 myń 200 teńgeni alý ústinde olar qolǵa tústi.
«Osy ispettes taǵy úsh tehnıkalyq jabdyq ustalǵandardyń biriniń - 39 jasar azamat A.-nyń úıin tintý kezinde tabyldy. Seziktiler óz kinálaryn tolyǵymen moıyndady jáne bul quraldy olar Qytaıdan ákelgenderin aıtty. Ustalǵandardyń bireýi buryn bótenniń múlkin urlaǵany úshin qylmystyq jaýapkershilikke tartylǵan, al onyń «seriktesi» tapsyrys boıynsha jıhaz jasaıtyn jeke kásipker bolyp shyqty. Tárkilengen tehnıkalyq quraldar saraptamaǵa jiberildi»,- dep atap kórsetti maıor Nejınskıı.
Zań tilimen aıtqanda, eki pysyq almatylyqtyń áreketi jarııalaýǵa tyıym salynǵan tyńdaýǵa arnalǵan tehnıkalyq quraldy zańsyz satqan. Eki aıypkerdiń ústinen qylmystyq is qozǵaldy.
