Almatyda «Rýhanı jańǵyrý» baǵdarlamasy aıasynda 200 joba júzege asyrylady

ALMATY. QazAqparat – 2020 jylǵa arnalǵan «Rýhanı jańǵyrý» baǵdarlamasyn iske asyrý jospary 200 jobany qamtıdy, oǵan 211 is-shara kiredi. Bul týraly Almaty qalasy boıynsha «Rýhanı jańǵyrý» jobalyq keńsesiniń basshysy Gúlnar Qońyrova baspasóz máslıhaty barysynda málim etti, dep habarlaıdy QazAqparat tilshisi.

Gúlnar Qońyrovanyń aıtýynsha, bıyl ıÝNESKO-nyń kúntizbesine –shyǵys oıshyly Ábý Nasyr ál-Farabıdiń 1150 jyldyǵy men Uly Abaıdyń 175 jyldyǵy engizildi. Osyǵan baılanysty, josparǵa qosymsha 38 shara qosyldy.

«Bul – Abai Street Fest ashyq aspan astyndaǵy festıvaldiń teatrlandyrylǵan qoıylymy, onyń aıasynda «Jelsiz túnde jaryq aı» taqyrybynda «Mýzeıdegi tún» aktsııasyn, «Abaı weekend» festıvalin, Farabi World jas ǵalymdar forýmyn jáne ál-Farabıdiń mereıtoıyna arnalǵan halyqaralyq konferentsııany ótkizý kózdelgen. Jaqynda Jetisý aýdanynda Abaıdyń músini ornatyldy», — dedi Gúlnar Qońyrova.

Onyń aıtýynsha, «Jańa gýmanıtarlyq bilim: qazaq tilindegi 100 jańa oqýlyq» arnaıy jobasyn júzege asyrý aıasynda qalanyń joǵary oqý oryndary 7 oqýlyq pen oqý quralyn aýdarýǵa jáne shyǵarýǵa bastama jasady, bul josparlanǵan 100 oqýlyqtan bólek. Baǵdarlamalyq maqala shyqqanyna 3 jyl tolýyna oraı joǵary oqý oryndary úshin «Rýhanı jańǵyrýdy taný negizderi» kontseptýaldy oqýlyǵyn basyp shyǵarý josparlanǵan.

Ultty damytý jáne halyqaralyq ustanym boıynsha «Jahandyq álemdegi qazaqstandyq zamanaýı mádenıet» arnaıy jobasy erekshe oryn alady. Oǵan mýzykalyq murany ilgeriletý jáne túrli eldermen shyǵarmashylyq baılanystaryn keńeıtý úshin halyqaralyq festıvalder engen. Bul bólim «Qazaqstannyń kıeli kartasy» jobasyn iske asyrýdy qamtıdy.

Sondaı-aq, bıyl da arheologııalyq murajaı keshenderin, ashyq aspan astyndaǵy murajaılardy qurý boıynsha jumystar jalǵastyrylatyn bolady. Dala folklory men mýzykasyn tanymal etý maqsatynda Sazgen-sazy folklorlyq-etnografııalyq ansambliniń Sankt-Peterbýrgke, sondaı-aq qýyrshaqtar teatrynyń Polsha men Bolgarııaǵa arnalǵan halyqaralyq festıvalge sheteldik gastrolderi josparlanǵan. Buǵan qosa, «Boraldaı saq qorǵandary» arheologııalyq parkinde qazaq jáne búkil túrki áleminiń tarıhı, mádenı murasyn kópshilikke taratý úshin «Uly dala — kóshpendiler álemi» halyqaralyq etnografııalyq festıvali ótedi.

«Baı ádebı murany saqtaý maqsatynda osymen úshinshi jyl qatarynan Halyqaralyq jazýshylar forýmy ótedi, ol qazirgi zamannyń ataqty jazýshylaryn jınaıdy jáne álemniń túrli elderiniń jazýshylary men ádebıetshileri úshin dıalog alańyna aınalady», — dep qosty G. Qońyrova.

Memlekettiń, qoǵamnyń, jergilikti qaýymdastyqtyń damýyn negizinen «Týǵan jer» arnaıy jobasyn qamtıdy. Týǵan jerge, onyń mádenıetine, ádet-ǵurpyna, dástúrlerine erekshe kóńil bólinedi, bul patrıotızmniń kórinisi bolyp tabylady. Onyń quramynan qalalyqtardyń tikeleı qatysýymen ótetin aýdandyq, qalalyq sharalar men shyǵarmashylyq konkýrstar, aktsııalar kiredi.

«Bul jospar turǵyndardy baǵdarlamaǵa keńinen tartý úshin jasalǵan, ony júzege asyrýǵa halyqtyń barlyq sanattarynyń ókilderi qatysady. Olar – stýdentter men oqýshylar, bilim berý jáne mádenıet qyzmetkerleri, halyqtyń áleýmettik osal toptary, qart adamdar, jastar, ózin-ózi jumyspen qamtyǵandar jáne basqalary. Osylaısha áleýmettik mańyzdy jobalardyń sany artatyn bolady», — dep atap ótti Qoǵamdyq damý basqarmasy basshysy orynbasarynyń mindetin atqarýshy Farıza Qambarova.