Almatyda Roza Rymbaevanyń «Erteńime senemin» atty mereıtoılyq kontserti ótedi (FOTO)
ALMATY. QazAqparat - Almatyda ústimizdegi jyldyń 28-shi qazanynda Respýblıka saraıynda Qazaqstannyń halyq ártisi, ustaz ári professor, ataqty estrada ánshisi Roza Rymbaevanyń shyǵarmashylyq qyzmetine 40 jyl tolýyna oraı, «Erteńime senemin» atty mereıtoılyq kontserti ótedi. Osyǵan baılanysty búgin Roza Qýanyshqyzy jýrnalıstermen kezdesip, aldaǵy bolatyn shyǵarmashylyq keshi jaıly syr bólisti.
«Meniń sahnada júrgenime bıyl 40 jyl toldy. Ol kezinde osy Respýblıka saraıynan bastaý alyp edi. Sodan beri mine, attaı 40 jyl ótipti. Bul az merzim emes. Sondyqtan, aldaǵy shyǵarmashylyq keshim - bul men úshin esep berý kontserti. Árıne, qobaljýdamyn. Óıtkeni, búgingi kórermenniń talǵamy, kózqarasy basqashalaý dep oılaımyn. Sondyqtan, bul kontsertke barynsha tyńǵylyqty daıyndaldyq. Bul men úshin shyǵarmashylyq emtıhan ispettes. Halqyma qanshalyqty babymda ekenimdi jáne repertýarymdy kórsetkim keledi. Kórermen kútken deńgeıden kórinsem deımin», - dedi R. Rymbaeva.
Sonymen qatar, Roza Qýanyshqyzy aldaǵy kontsertiniń Almaty q. ákiminiń estradalyq-sımfonııalyq orkestriniń súıemeledýimen júrgiziletindigin aıtty.
«Sırek bolsa da, meniń eń aıtýly kontsertterim orkestrdiń súıemeldeýimen júzege asyrylady. Bul joly da men orkestrdiń kómegimen ózim jáne ánshilermen birge dýet bolyp án shyrqaımyn. Maǵan ánshiler, orkestr jáne mýzykant uldarym - Álı men Mádı jan-jaqty shyǵarmashylyq qoldaý kórsetip jatyr. Men bul jaǵynan baqytty janmyn», - dedi R. Rymbaeva.
Aıta ketelik, kontsertke KSRO halyq ártisi Álibek Dinishev, "Astana Opera" ánshisi Súndet Baıǵojın, estrada ánshileri - Jubanysh Jeksenuly, Rústem Nurjigit, Mádına S2dýaqasova, Álı Oqapov, Móldir Áýelbekova, Maqpal Isabekova, Dilnaz Ahmadıeva, Almas Kishkenbaev, Nurjan Kermenbaev, Indıra Edilbaeva, The Jigits jáne ORDA toptary qatysady.
Sondaı-aq, mereıtoılyq kontsert qazirgi kezdegi tehnologııalar men zamanaýı shoý salasyndaǵy jasalymdarǵa negizdele otyryp, ánshiniń mártebesine saı daıyndalǵan. Kontserttik baǵdarlamany daıyndaýǵa QR men TMD elderiniń eń úzdik mamandary shaqyryldy. Shyǵarmashylyq kesh "live" formatynda ótedi. Kontsert qorytyndysy boıynsha jazylyp alynǵan dybystyq materıaldar negizinde mereıtoılyq aýdıo jáne beıne dıskiler, beıne klıpter shyǵarylady.
Aıta ketelik, 28-shi qazan - Roza Rymbaevanyń týǵan kúni.
