Almatyda Roza Álqojanyń án keshi ótedi
ALMATY. 15 jeltoqsan. QazAqparat /Erlik Erjanuly/ - Búgin Almatydaǵy Ómirbek Joldasbekov atyndaǵy stýdentter saraıynda aqyn, ánshi, sazger Roza Álqojanyń " Men syıǵa tartqan oramal" dep atalatyn án keshi bolady.
Oǵan Rozanyń ánderin naqyshyna keltirip oryndap júrgen Altynaı Jorabaeva, Baıan Nurmysheva, Ómirqul Anııazov jáne taǵy basqa da kóptegen óner sheberleri qatyspaq. Keshti aıtysker aqyn Jandarbek Bulǵaqov pen jýrnalıst Ásel Ergeshqyzy júrgizedi.
Mektep qabyrǵasynda júrip án shyǵara bastaǵan R. Álqojanyń qyryqqa jýyq áni bar. Onyń Ajar Túzelbekqyzynyń oryndaýyndaǵy "Saǵyndym seni" (sózi Israıl Saparbaı), "Baqyttymyn" jáne Baıan Nurmysheva aıtatyn "Jibektiń eli", Erkin Nurjanovtyń repertýaryndaǵy "Qańtarda jaýǵan jańbyr" (sózi Jaras Sársek), Aqbota Kerimbekova shyrqaıtyn "Oryndalmas tilegim", Lázzat Jolamanova áýeletken "Saǵynǵanym bolmasa" (sózi Esenqul Jaqypbekov) sııaqty ánderi tyńdarmannyń ystyq yqylasyna bólenýde.
Rozany ánshi retinde jalpy jurtqa tanytýǵa "Men syıǵa tartqan oramal" (sózi Gúlnár Salyqbaeva), "Ol kóktem oralmaıdy" (sózi Qasymhan Begmanov), "Syǵan qyzy" (sózi Israıl Saparbaı), "Jylatqanyń netkeniń (sózi men áni Aqmaral Leýbaeva), "Qara kúz (sózi men áni Esenqul Jaqypbekov) óz yqpalyn tıgizdi. Onyń «Men syıǵa tartqan oramal» dep atalatyn alashqy albomy 2008 jyly jaryq kórgen bolatyn. 2010 jyly "Myna ómir ǵajap qandaı" dep atalatyn jańa albomynyń tusaýkeserin jasady.
