Almatyda rejısser, operator jáne stsenarısterdiń Ortalyq Azııa aımaǵyndaǵy eń alǵashqy Joǵary kýrsy ashyldy
ALMATY. 27 maýsym. QazAqparat /Erlik Erjanuly/ - Almatydaǵy Temirbek Júrgenov atyndaǵy Qazaqtyń ulttyq óner akademııasynda Ortalyq Azııa aımaǵyndaǵy rejısser, operator jáne stsenarısterdiń tuńǵysh Joǵary kýrsy ashyldy. Ony akademııa rektory Arystanbek Muhamedıuly búgin baspasóz máslıhatynda málimdedi.
«Kýrs baǵdarlamasy eki jyldyq. Oǵan qabyldanǵandar birinshi kýrsta Almatyda esimi álemge áıgili óner maıtalmandarynan tálim alyp, ekinshi kýrsty Máskeýde jalǵastyratyn bolady. Úmitkerlerdi irikteý tamyz aıynda bastalady. Kásibı deńgeıi joǵary bul mamandarǵa suranys kóp»,-dedi A. Muhamedıuly.
Kýrsta dáris berýge qazirdiń ózinde reseılik Iraklı Kvırıkadze, Valerıı Rýdın, Evgenıı Gıngzbýrg sııaqty sheberler óz kelisimderin berip otyr. Onda úmitkerler arnaıy synaq arqyly iriktelip, grandpen jáne aqyly negizde oqýǵa qabyldanady dep josparlanýda.
Jalpy, ǵylymı baǵyttaǵy magıstratýra men PhD-ǵa qaraǵanda joǵary kýrstyq oqý baǵdarlamasy shyǵarmashylyq sıpatta bolmaq. Oǵan úkimetaralyq kelisim boıynsha grand arqyly Qyrǵyzstan, Qazaqstan, Tájikstan, Reseı jáne Belarýs eliniń rejısser, operator jáne stsenarısteriniń qatysýǵa múmkindigi bar.
