Almatyda rejısser Azız Jambakıevtiń qysqa metrajdy «Shatyrqanat kóbelek» kórkem fılminiń túsirilimi bastaldy
ALMATY. QazAqparat - Almatyda «White Cloud Production» jáne «Sled Production» kompanııalary birlesip, qysqa metrajdy «Shatyrqanat kóbelek» kórkem fılminiń túsirilimin bastady.
Fılmniń rejısseri - almatylyq Azız Jambakıev. Basty rólderdi Nellı Tsaı, Qýat Ábeshev, Áıgerim Mustafa somdaıdy. Sondaı-aq, bul kınokartınaǵa túsýge Ásel Saǵatova, Arýjan Jazylbekova jáne Qarlyǵash Muhamedjanova shaqyrylǵan.
Al fılmniń prodıýserleri - Azız Jambakıevtiń ózi jáne Natalıa Rastoropnova men Edýard Kım.
Post-prodakshn, ıaǵnı montajdaý, dybystandyrý jumystary aldaǵy qarasha aılarynda Máskeý jáne Berlın qalalarynda júrgiziledi.
Atalmysh týyndy áıel zatynyń ishki dúnıesi men tús kórý taqyrybyn qozǵaıdy. Munda basty keıipker - Janeldiń ómiri kún saıyn qaıtalanyp kele beretin belgili bir áreketterdiń júıesi ispettes. Biraq, onyń túsi aqyr aıaǵynda ony óziniń áıelge tán náziktigin jáne taǵdyryn uǵynýǵa múmkindik beredi. «Men úshin klassıkalyq sıýjetten kóri túısikke quralǵan kıno túsirý mańyzdy boldy. Árıne, áleýmettik drama nemese melodrama túsirýge bolar edi. Biraq biz kıno tilin paıdalana otyryp, áıel taǵdyryn, onyń túısigindegi úderister men ishki jan dúnıesin pash etkimiz keldi. Bul men úshin óte mańyzdy jumys», - dedi rejısser. Aıta ketelik, Azız Jambakıev Berlın kınofestıvaliniń laýreaty, «Eń úzdik operatorlyq jumys» atalymy boıynsha kúmis aıýdyń ıegeri. Azııa kınoakademııasynyń qurmeti múshesi.
