Almatyda Respýblıkamyzdaǵy tuńǵysh áleýmettik kórme ashyldy
ALMATY. Qyrkúıektiń 29-y. QazAqparat /Erbol Turymbetov/ - Almatydaǵy «Astanalyq» sýpermarketiniń janyndaǵy Áleýmettik jarnama galereıasynda Almaly aýdanynyń qarapaıym turǵyndarynyń kórmesi ashyldy.
Sharany Almaty qalasy Almaly aýdany ákimdiginiń qoldaýymen Qazaqstannyń Jastar medıaodaǵy, «Dom Ideı Koleso» JShS, Almaty qalasynyń Azamattyq alıansy jáne «Dastarhan» JShS birlese uıymdastyryp otyr. Onda «Biz - almalylyqtarmyz» atty baıqaý jeńimpazdarynyń fotosýretteri qoıylǵan. Baıqaýdyń maqsaty turǵyndardyń týǵan qalasyna, aýdanyna degen súıispenshiligin týdyrý, áleýmettik máselelerge kóńil aýdartý jáne aýdan bolashaǵy týraly ashyq suhbatqa shaqyrýǵa baǵyttalǵan.
Baıqaý úzdik maman, úzdik PIK, úzdik aýla, úzdik kireberis, tiri ańyz jáne qyzyqty bastama atalymdary boıynsha júrgizilgen. Oǵan Almaly aýdany turǵyndarynan barlyǵy 50 týyndy usynylyp, onyń 20-sy eń úzdikteri dep tanyldy.
«Bizdiń basty baılyǵymyz - adamdar, bizdiń turǵyndar. Basty ıdeıamyz osy qalamyzdyń shynaıy, janashyr turǵyndaryn kórsetý edi. Olardyń bári osy qalamyzdyń gúldenýi men órkendeýine úles qosqan jandar. Jobany júzege asyrýda qoǵamnyń ózekti máselelerine basa nazar aýdaryldy», dedi Almaty qalasy Almaly aýdanynyń ákimi Marat Pirinbekov.
