Almatyda respýblıkalyq «Qaıyrymdylyq kerýeni ІІІ» baıqaýynyń jeńimpazdary marapattaldy
Igi shara Nursultan Nazarbaev qorynyń uıymdastyrýymen úshinshi márte ótkizilip otyr. Sondaı-aq, oǵan isker áıelder qaýymdastyǵy da uıytqy boldy. Bıyl qatysýshylardyń sany aldyńǵy jyldarmen salystyrǵanda rekordtyq kórsetkishke jetken. ıAǵnı, 700 ge jýyq ótinim kelip túsken.
Uıymdastyrýshylardyń aıtýynsha, jobaǵa qatysýshylar - jarqyn tulǵalar. Olar muqtaj adamdarǵa kómektesedi, qaıyrymdylyqpen belsendi aınalysady, batyldyq tanytady. Olardyń arasynda elimizdiń mádenıetin damytýǵa at salysatyn, ekologııalyq máselelerdi sheshetin, áleýmettik kásipkerlikti júzege asyratyndar da bar.
Marapattaý rásimine «Qaıyrymdylyq kerýeni ІІІ « baıqaýynyń komıssııa tóraǵasy, Nursultan Nazarbaev Qorynyń dırektory Darıǵa Nazarbaeva men Almaty qalasynyń ákimi Baqytjan Saǵyntaev qatysty.
Darıǵa Nazarbaeva baıqaýǵa qatysýǵa nıet etken meıirimdi, qaıyrymdy adamdardyń sany jyl saıyn kóbeıip kele jatqanyn tilge tıek etti.
«Bıylǵy «Qaıyrymdylyq kerýeni» erekshe. Koronavırýs pandemııasy, karantındik shekteýler árqaısymyzdyń ómirimizge áser etti. Búgingi sharaǵa qatysýshylar arasynda osy qıyn-qystaý kezeńde óz kúshteri men múmkindikterin aıamaǵandaryn erekshe atap ótkim keledi. Árbir oqıǵanyń artynda adam basyna túsken qaıǵy men muń jáne meıirimdilik pen mahabbat tur. Meıirimdilik pen yntymaqtastyq birlesken kezde, tótep bere almaıtyn qıyndyq bolmaq emes. Jarqyn oqıǵalardyń kýási bolý úlken qýanysh. Sondaı-aq, halqymyz úshin, elimiz úshin, týǵan Qazaqstanymyz úshin maqtanysh sezimi oıanady»,-dedi Darıǵa Nazarbaeva.
«Týǵan jer» nomınatsııasynyń jeńimpazy Dáýren Kulshygeshovtyń aıtýynsha, qaıyrymdylyq-qazaqtyń qanyna bitken qasıet.
«Koronavırýs indeti órshigen kezde el-jurtqa barynsha kómek qolyn sozýǵa tyrystyq. Semeıde birneshe azamat birigip 177 mln teńgege Reseıden ókpeni jeldetý apparatyn ákeldik. Oǵan qosa emdeý mekemelerine 17 mln teńgeniń dári-dármegin aldyrdyq. Sonymen qatar, kópbalaly analarǵa úı áperip jatyrmyz. Jaqynda besinshi úıdi syıǵa tarttyq»,- deıdi «Týǵan jer» nomınatsııasy boıynsha úzdik dep tanylǵan Dáýren Kulshygeshov.
Al, «Asar» nomınatsııasynyń júldegeri Gúlsim Elekbaevanyń pikirinshe,
qaıyrymylyq jasaımyn degen adamǵa eshteńe de (múgedektik te ) kedergi bola almaıdy.
« Eger adam jaqsylyq jasasa, ol ózine eselep qaıtady. Men óz basym qashan da jaqsylyq jasaýǵa asyǵyp turamyn. Men oıynshyq toqımyn. Sol qolymnan shyqqan buıymdardy balalar úıleri men turmysy tómen otbasynyń balaryna tegin taratyp beremin»,- deıdi ol.
Baıqaý jeńimpazdarynyń esimderi «Asar», «Týǵan jer», «Meıirim jolynda», «Batyl júrek», «Qaıyrymdylyq tarıhy» sııaqty bes atalym boıynsha anyqtaldy. Bıyl onyń qataryna jańadan «Janýarǵa meıirim», «Bala júregi» nomınatsııasy qosyldy. Aqmola oblysynynan kelgen 8 jasar Eraly Dolqyn ata-anasynyń táttige bergen tıyn-tebenin jınap, ony ókpeni jeldetý apparatyn alýǵa jumsapty. Búgin ol da jeńimpazdar qatarynan tabyldy.
«Meniń jasym segizde. Úshinshi synypta oqımyn. Men bir jyl boıy ata-anam, týysqandarym bergen aqshany jınadym. Oǵan ózime qajetti nárse alǵym kelgen. Jazda adamdar qatty aýryǵanda jınalǵan 6350 teńgemdi apparat alýǵa berdim. Myna aýrý tezirek ketip, adamdar endi aýyrmasa eken»,-deıdi «Bala júregi» nomınatsııasynyń jeńimpazy Eraly Dolqyn
Baıqaýǵa áleýmettik, qoǵamdyq máselelerdi sheshýge atsalysyp júrgen, basqalarǵa ıgi isterimen úlgi bola bilgen jeke jáne zańdy tulǵalar ǵana qatysty. Al, kásipkerlik sýbektileri men qaıyrymdylyq qyzmetti memlekettik qoldaý arqyly júrgizetin tulǵalar qatystyrylmaıdy.
Aıta keteıik, osydan úsh jyl buryn baıqaý alǵash ret uıymdastyrylǵanda oǵan 100 ge tarta adam qatysqan. Byltyr olardyń sany 300 ge jýyqtasa, al bıyl 670 ótinim túsken. Nátıjesinde 7 nomıntsııa boıynsha 21 adam jeńimpaz atandy.
