Almatyda Respýblıkalyq «Qaýipsiz jol» jedel aldyn alý sharasy ótip jatyr
ALMATY. Sáýirdiń 13-i. QazAqparat /Ádilet Musahaev/ - Osy sharaǵa baılanysty Almaty qalasy Alataý aýdany jol polıtseıleri qoǵamdyq kólik júrgizýshileri arasynda «ashyq esik» kúnin ótkizip otyr,
dep habarlaıdy QazAqparat.
Alataý aýdany ІІB JPB bastyǵy kapıtan Arystan Úkıevtiń aıtýynsha, bul sharanyń maqsaty - jol-kólik oqıǵasyn tómendetip, barlyq kólik júrgizýshilerge jol erejesin saqtaýyna eskertý jasaý. «Júrgizýshilerdiń árbir buzǵan jol erejesi úlken apatqa ákelip soǵary anyq. Jaqynda Atakent kórme ortalyǵynyń janynda qoǵamdyq kólik júrgizýshisiniń jol erejesin buzýynan áıel adam qaıtys boldy. Sondyqtan aýdanymyzda ornalasqan barlyq avtoparkterde osyndaı sharany ótkizip otyrmyz», deıdi A.Úkıev.
Sondaı-aq ol qalada qoǵamdyq kólikterdiń óte kóptigin jáne syrttan da kóptep keletindigin aıtady.
«Olardyń kóbi jol erejesin saqtaı bermeıdi. Aıaldamaǵa jetpesten toqtaıdy nemese jaıaý júrginshiler ótkeline adamdardy túsirip jatady. Nege óıtip jol erejesin buzasyń dep suraı bastasań, bul jerde óte kóp adam jınalǵandyqtan toqtadyq dep jaýap beredi. Menińshe, onyń bárine júrgizýshilerdiń ózderi kináli, ár jerge toqtap adamdardy jaman úıretip alǵan», dep atap ótti Arystan Úkıev.
