Almatyda respýblıkalyq ǵylymı jarystyń saltanatty ashylý rásimi boldy
ALMATY. Aqpannyń 22-si. QazAqparat /Názıra Eleýhan/ - Búgin Almatyda oqýshylar arasynda ótetin respýblıkalyq ǵylymı jarystyń saltanatty ashylý rásimi bolyp ótti,
dep habarlaıdy QazAqparat.
Atalmysh shara QR Bilim jáne ǵylym mınıstrliginiń qoldaýymen «Daryn» respýblıkalyq ǵylymı-tájirıbelik ortalyǵynyń uıymdastyrýymen ótti.
Ǵylym men bilimdi kiriktirý, urpaqtar sabaqtastyǵyn nyǵaıtý, elimizdiń bolashaq ǵylymı áleýetin qalyptastyrý maqsatynda ótkizilip turatyn dástúrli sharaǵa bıyl, 400-den asa oqýshylar qatysady. Buǵan deıin aýdandyq, oblystyq irikteýden ótken oqýshylardyń ǵylymı zertteýler saıystary tórt baǵyt, 17 sektsııa boıynsha ótkiziletin bolady.
Oqýshylar jarysyna ǵylymı jetekshilikti QR Ulttyq ǵylym akademııasy júzege asyrady. Elimizdiń ǵalymdary qazylyq jasap, baǵalaryn qoıady.
«Jarys sońynda eń úzdik dep tanylǵan jas zertteýshilerden qurama komanda qurylyp, olar bıylǵy jyly mamyr aıynyń 9-14 aralyǵynda AQSh-tyń San-Hose qalasynda ótetin 61-shi «Intel ISEF -2010» oqýshylar ǵylymı jobalarynyń halyqaralyq kórmesine qatysady. Bul jarysqa búkil álemniń 50-60 elinen 3000-nan asa oqýshylar qatysady. 13-18 jas aralyǵyndaǵy oqýshylar arasynda ótetin jarysqa bizdiń elden 30-dan asa túlek qatysady. Ótken jyly Altynaı Jumadildaeva men Nazerke Baqytjannyń ǵylymı jobalary qola medaldarmen marapattaldy», dedi sharany uıymdastyrýshylardyń biri, «Daryn» respýblıkalyq ǵylymı-tájirıbelik ortalyqtyń bas ádiskeri Rasıma Sadaqbaeva.
Jarysqa qatysýshylardyń barlyǵyna estelik medaldar tabystalyp, qorytyndy boıynsha jeńimpaz atanǵan oqýshylar dıplomdarmen marapattalatyn bolady. Sonymen qatar, joǵarǵy oqý oryndary granttar usynady.
Jas zertteýshilerge arnalǵan baıqaý aqpan aıynyń 25-ne deıin jalǵasady.
