Almatyda resmı tirkelgen qansha dinı birlestik pen konfessııa bar

ALMATY. QazAqparat - Almatyda 17 konfessııa bar, sondaı-aq, resmı tirkelgen 190 dinı birlestik jumys isteıdi. Bul týraly QazAqparat tilshisiniń saýalyna Almaty qalasy din isteri jónindegi basqarmasy jaýap berdi.

Vedomstvonyń málimetinshe, Almaty — mıllıondaǵan halqy bar úlken megapolıs. Tıisinshe, adamdar neǵurlym kóp bolsa, soǵurlym olar ártúrli dindi ustanady.

Eger Respýblıkada 18 túrli konfessııa tirkelgen bolsa, Almatyda 17 konfessııa bar. 190 resmı tirkelgen dinı birlestik jumys isteıdi. Atalǵan dinı birlestikterdiń qyzmeti Zańmen retteledi. Eger de qandaı da bir quqyq buzýshylyqtar bolǵan jaǵdaıda sáıkesinshe sharalar qabyldanady.
Resmı tirkelgen dinı birlestikterden bólek, qoǵamda destrýktıvti sıpattaǵy dinı aǵymdar da bar. Bul dinı aǵymdardyń basty ereksheligi eshbir resmı tirkeýden ótpegen jáne qoǵamda dástúrli qundylyqtardy joqqa shyǵara otyryp, ony moıyndamaıdy. Osyǵan oraı, Almaty qalasy Din isteri jónindegi basqarmasy tarapynan memlekettiń din salasyndaǵy saıasatyn júzege asyrýshy jergilikti atqarýshy organ retinde aldyn alý boıynsha keshendi jumystar júrgizilýde.
Qazaqstan Respýblıkasy Konstıtýtsııasynyń 19-babyna sáıkes, árkim óziniń qaı ultqa, qaı partııaǵa jáne qaı dinge jatatynyn ózi anyqtaýǵa jáne ony kórsetý-kórsetpeýge haqyly. Osyǵan oraı, Basqarma tarapynan dindi ustanatyn nemese ustanbaıtyn azamattardyń esebi júrgizilmeıdi.
Almaty qalasy din isteri jónindegi basqarma, sondaı-aq, jat aǵymnyń sońynan erip, opyq jegen qala turǵyny týraly mysal keltirdi.
«Radıkaldy sıpattaǵy dinı aǵymnyń jetegine erip, Sırııaǵa attanǵan otandastarymyz 2019 jyly «Jýsan» operatsııasy kómegimen Qazaqstanǵa oraldy. Keıbiri jubaılarynan aıyrylyp, endi biri balalaryn jer qoınyna tapsyryp qaıtty. Olardyń qatarynda almatylyq Gaýhar (esimi ózgertilgen) bar. Gaýhar Sırııaǵa kúıeýiniń úgitteýimen barǵan. Kóp balaly ana jubaıymen ajyrasqan soń basqa ulttyń azamatymen tanysyp, ekinshi ret otaý qurǵan.
Bastapqyda ımanjúzdi bolyp kórinip, qoldaý kórsetken. Keıin dástúrli namazǵa tyıym salǵan. Radıkaldy sıpattaǵy dinı aǵymdy ustanatynyn sol kezde túsingen. 2016 jyly TMD eli arqyly Túrkııaǵa ushyp, kúıeýi keıin oqý-jattyǵýǵa ketip, qaıta oralmaǵan. Sırııada namaz oqymaǵandyqtan Gaýhar qýdalaýǵa ushyraǵan. Ári jergilikti tártipke baǵynbaǵandyqtan ony «tyńshy» dep ataǵan.
Keıipkerdiń sózinshe ol jaqta namaz oqymaǵandardy «kápirler» deıdi. Túrli jaman sózderdi aıtady. Birin-biri urady, óltirýden de qaımyqpaıdy. Ol sol jaqta júrip, Qazaqstanǵa jetetin beıbit eldiń joq ekenin túsingen», - dep habarlady Almaty qalasynyń Din isteri jónindegi basqarmasy.