Almatyda reseılik nómirli kólikterge 21,3 mln teńge aıyppul salyndy

ALMATY. QazAqparat - Almatyda jyl basynan beri Reseıde tirkelgen kólik júrgizýshileri 60 myńǵa jýyq zań buzýshylyq jasaǵan, dep habarlaıdy QazAqparat tilshisi.

Almaty qalalyq Polıtsııa departamenti megapolıste jyl basynan beri RF kólikteriniń júrgizýshileri jasaǵan 59 364 quqyq buzýshylyq tirkelgenin málim etti. Salynǵan aıyppul kólemi 21,3 mıllıon teńgeden asady.

«Aıta ketý kerek, jol qozǵalysyna qatysýshylardyń osy sanatyndaǵy kólik júrgizý tártibi nashar. Shet memleketterdiń nómirleri «Jol qozǵalysy qaýipsizdigi» jáne «Sergek» avtomattandyrylǵan aqparattyq júıeleri arqyly tanylmaıdy dep jańylysyp, olardyń júrgizýshileri barlyq jerde jol qozǵalysy erejelerin buzady: jyldamdyqty shekten tys asyrady, baǵdarshamnyń tyıym salynǵan belgisine qaramaı, qıylystardy kesip ótedi, qarsy kele jatqan jolaqqa ótedi, jol belgileri men tańbalaý talaptaryn saqtamaıdy. Bul jol apatyna ákep soǵady. Túrli qýlyqqa barý arqyly jaýapkershilikten jaltarý áreketteri sátti aıaqtalmaıtynyn jáne nátıjesiz bolatynyn resmı túrde málimdeımiz», – dedi Almaty qalalyq PD bastyǵynyń birinshi orynbasary Nurlan Almasbekov.

Onyń aıtýynsha, Zań – bárine birdeı. Jol qozǵalysy erejeleri qatań saqtalýy tıis.

«Almaty joldarynda shetelde tirkelgen kólikterdiń qatysýymen 50-den astam aýyr jol apaty boldy. Sonyń saldarynan bir adam qaza taýyp, taǵy 59 adam jaraqat aldy»,- deıdi polıtsııa ókili.