Almatyda regbıden Jastar oıyndary márege jetti
ASTANA. QazAqparat - Búgin Almatyda «QR Tuńǵysh Prezıdentiniń Qory - Ult kóshbasshysy» stadıonynda regbıden 1997-1999 jyldary týǵan jasóspirimder men qyzdar arasynda regbıden jastar oıyndary aıaqtaldy. Qazaqstannyń túkpir-túkpirinen kelgen 11 - erler jáne 9 qyzdar komandasy ózara myqtyny anyqtady, dep habarlaıdy QazAqparat Almaty qalasynyń dene shynyqtyrý jáne sport basqarmasyna silteme jasap.
Tóreshiler Almaty men Almaty oblysynyń sportshylary árdaıym jaqsy daıyndyqpen keletinin atap ótti. Árıne, qalǵan komandalardyń da tájirıbıesi jyl sanap artyp keledi. Biraq, almatylyqtardyń deńgeıi olardan áldeqaıda joǵary.
Jarystyń erejesine sáıkes, ár komanda 14 oıynshydan quralǵan, onyń 12-si alańǵa shyǵyp oınaıdy. Ár kezdesý 7 mınýttan turatyn eki oıynnan turady. Fınaldyq oıyndar óte tartysty ótti. Uldar arasyndaǵy aqtyq básekede alań qojaıyndary 17:14 esebimen Taldyqorǵan komandasyn tize búktirse, qyzdar arasyndaǵy fınaldyq oıyndarda taldyqorǵandyq burymdylar 12:7 esebimen Almaty quramasyn jeńdi. Osylaısha, alań ıeleri kúmispen kúptelse, qolany qyzdar arasynda Qostanaı oblysy, al uldar arasynda Mańǵystaý oblysy qanaǵat tutty.
Jarystyń basty - maqsaty salaýatty ómir saltyn nasıhattaý, el turǵyndaryn sportpen jáne dene shynyqtyrýmen kúndelikti aınalysýǵa baýlý, jazǵy sport túrlerinen úzdik sportshylardy anyqtaý, úzdik regbıshilerdi elimizdiń qurama komandalaryna irikteý, olardy 2017 jyly Indonezııada ótetin Azııa oıyndary jáne 2018 jyly Argentına astanasy Býenos-Aıreste jalaýy jelbireıtin jazǵy jasóspirimder Olımpıadasyna daıyndaý.
