Almatyda regbıden Qazaqstan chempıonatynyń 5-kezeńi ótti
ASTANA. QazAqparat - Búgin Almatydaǵy «Avıator» stadıonynda regbı 7-den el birinshiliginiń 5-shi týry ótti. Atalmysh dodada Qazaqstannyń túkpir-túkpirinen kelgen joǵary lıgadaǵy erlerdiń - 8, áıelderdiń 6 komandasy baq synady, dep habarlaıdy QazAqparat.
Jarys nátıjesi boıynsha chempıonattyń júldeli oryndaryn sarapqa salatyn úzdik komandalar anyqtaldy, erler arasynda - "Olımp" (Taldyqorǵan), "Azııa sport" (Almaty) jáne "Kaspıı" (Aqtaý), al áıelder arasynda "Azııa sport" (Almaty), "Olımp" (Taldykorgan) jáne QBJSM-3 (Almaty) jaqsy kórsetkishtermen erekshelendi. 
Aıta keterligi, chempıonatqa jalpy 12 erler jáne 8 áıelder komandasy qatysady. Alaıda, qarjylandyrý máselesine baılanysty keıbiri jarysqa kele almady. Biraq Regbı federatsııasynyń prezıdenti Murat Ýanbaev Óskemende ótetin kelesi, altynshy kezeńge 20 komandanyń barlyǵy qatysatynyna senimdi. Chempıonattyń sońǵy jetinshi kezeńi 15 qazan kúni ótedi.
«Ssy sport túrine qala turǵyndaryn qyzyqtyrǵymyz keledi, óıtkeni, regbı Olımpıada oıyndarynyń qataryna qosylýy ábden múmkin. Qazirgi tańda, regbımen aınalysatyndar sany memlekettik gvardııa ujymdarymen qosa eseptegende, 10 myńǵa jetti. Sonymen qatar, sportshylardyń básekelestigi men sheberlikterin arttyrý úshin ár aýdanda bir komandadan qurý josparda bar. Aıta ketsek, áıelder qurama komandasy Azııa chempıonatynyń 14 dúrkin chempıony, sondaı-aq Azııa elderi komandalarynyń ishinde úzdikterdiń qatarynda», - dep atap ótti Murat Ýanbaev.
Eske sala ketsek, el birinshiligi jalpy 7 kezeńnen turady. Jarys qorytyndysy boıynsha úzdik ujymdar anyqtalady. Ázirge, 5 kezeńniń nátıjesi boıynsha Taldyqorǵan, Almaty jáne Mańǵystaý oblysynyń komandalary kósh bastap keledi.
