Almatyda referendým komıssııa músheleri úıden daýys beretinderge shyqty

ALMATY. QazAqparat – Almatyda referendým komıssııa músheleri, ýchaskelik polıtsııa men baqylaýshylar densaýlyǵyna baılanysty úıden daýys beretinderge bardy, dep habarlaıdy QazAqparat tilshisi.

Almaty qalasynyń turǵyny, zeınetker, 80 jastaǵy Raıhan Jumahanova úıinde daýys berdi. Komıssııa músheleri ájeıge baryp, móri bar bıýlletendi qolyna tabystady.

«Men densaýlyǵyma baılanysty úıden daýys beremin dep sheshtim. Bul saıası naýqannan tys qalǵym kelmedi. Eldiń bolashaǵy men urpaǵymnyń keleshegi úshin óz daýysymdy berdim», - dedi ol.

Raıhan Jumahanova turǵylyqty jeri boıynsha №401 referendým ýchaskesinde tirkelgen.

«№401 referendým ýchaskesinde tirkelgender sany - 2 888 adam. Onyń 8-i densaýlyqtaryna baılanysty úıden daýys berýge ótinish jasady. Zańnamaǵa sáıkes, úılerdi aralaýǵa komıssııa múshesimen birge ýchaskelik ınspektor, baqylaýshy shyqty», - deıdi №401 referendým ýchaskesiniń komıssııa múshesi Raýshan Shópaeva.