Almatyda Raıymbek dańǵylynda reversıvti jolaq paıda bolady

ALMATY. QazAqpart- Jylý jelilerin rekonstrýktsııalaýǵa baılanysty 28 shilde saǵat 00:00-den 10 tamyzǵa deıin Almaty qalasynyń Jetisý aýdanynda Raıymbek dańǵyly boıynda Baızaqov kóshesinen Kazakov kóshesine deıin batys baǵytta avtomotokólik qozǵalysy jabylady. Keptelisti azaıtý úshin bul aýmaqta reversıvti jolaq bólinedi, dep habarlaıdy QazAqparat tilshisi.

«Almaty jylý jelileri» JShS-niń málimetinshe, reversıvti jolaq - jol júrý baǵyty qarama-qarsy baǵytta ózgere alatyn aýyspaly jol bóligi.

Buǵan qosa, kún saıyn saǵat 15:00-den 19:00-ge deıin jylý jelilerin jańǵyrtý jónindegi jumystardy júrgizý ýaqytynda jol qozǵalysyna qosymsha baqylaý sharalary qoldanylady.

Almaty ákimi Erbolat Dosaevtyń tapsyrmasyna sáıkes, qurylysshylar dańǵyldyń asfalt jabynyn qalpyna keltirý jumysyn oqý jyly bastalǵanǵa deıin aıaqtaıdy.

Merdiger qurylys uıymy jylý magıstralin rekonstrýktsııalaýdy táýlik boıy, kidirissiz júrgizedi.

Bul úshin qurylǵan brıgadalar oryndalǵan jumystardyń sapasyn barynsha qamtamasyz etip, nysanda birneshe aýysymda jumys isteıdi.

Aldaǵy jylytý maýsymyna daıyndyq aıasynda atalǵan joldyń astyndaǵy qubyrda josparly jumys júrgizý kezinde qaýipsizdikti qamtamasyz etý úshin ýaqytsha shekteý engiziledi.

«Almaty jylý jelileri» JShS májbúrli qolaısyzdyqqa túsinistikpen qarap, kórsetilgen ýchaskeni aınalyp ótý jolyn aldyn ala qarastyrýdy suraıdy.

Buǵan deıin Raıymbek dańǵyly bir aıǵa jabylatynyn jazǵan bolatynbyz.