Almatyda «Rahat» bazarynyń janyndaǵy jerge qatysty daýǵa núkte qoıyldy
ALMATY. QazAqparat - Jetisý aýdanynyń ákimi Gúlnar Kókebaeva «Rahat» bazarynyń tóńiregindegi jaǵdaıdy túsindirdi, dep habarlaıdy QazAqparat tilshisi.
Onyń aıtýynsha, Jetisý aýdany, Soltústik aınalym, 9 kóshesinde ornalasqan 97 sotyq jer telimi 2015 jyldyń sáýir aıynan 2018 jyldyń 3 naýryzyna deıin «TKM» JShS-ne jalǵa berilgen.
Atalǵan seriktestik merzimniń aıaqtalýyna baılanysty qala ákimdigine ýchaskeni jalǵa alýdy uzartý týraly ýaqytynda júginbegen. Sondyqtan jer telimi olarǵa jalǵa berilmedi. Keıinnen seriktestik sotqa shaǵymdandy.
Mamandandyrylǵan aýdanaralyq ekonomıkalyq sotynyń 2018 jyldyń tamyz aıyndaǵy sheshimimen «TKM» JShS talaptaryn tolyq kóleminde qanaǵattandyrýdan bas tartyldy. Qalalyq sot sol jyly birinshi ınstantsııanyń sheshimin ózgerissiz qaldyrdy
«Odan soń jer ýchaskesi 2019 jyldyń maýsym aıynda ınvestıtsııalyq joba retinde «Almaty CPS» JShS-ne 4 jyl 11 aı merzimge paıdalanýǵa berildi. Ákimdiktiń bul sheshimine sotqa shaǵym jasalyp, jaldaý sharty buzyldy. Osylaısha, sot bul daýdy toqtatty jáne jer qazirgi ýaqytta memlekettiń ıeliginde»,- dedi aýdan ákimi.
Kásipkerlerdiń múddelerin qamtamasyz etý úshin, osy ýaqyt ishinde daýly aýmaqta turǵan jáne jalǵa alýǵa eshqandaı zańdy quqyǵy joq «TKM» JShS-niń jaldaý aqysyn tólegen aýdan ákimi kásipkerlermen de, jańarǵan kórshi bazarlardyń dırektorlarymen de birqatar kezdesý ótkizdi.
«Kezdesýler barysynda kásipkerler kórshi bazarlar olardyń saýda oryndaryn satyp alýǵa nemese jalǵa alýy jáne t.b. májbúr etý múmkin degen nıette alańdaýshylyq bildirdi. Olardyń múddelerin saqtaý úshin men kórshi bazarlardyń barlyq dırektorlaryn shaqyrdym, olar kepildik berdi jáne olardy jazbasha jaldaý sharttarynda bekitýge daıyn, al olar belgili bir kezeń ishinde 1 aıdan 3 aıǵa deıin demalys túrinde jeńildikter berdi ári jyl ishinde jaldaý jáne taǵy basqa tólemderdi ulǵaıtpaıdy»,- Gúlnar Kókebaeva.
Ákimniń sózinshe, «TKM» JShS jalǵa alýshylardy óz múddesine paıdalanýda.
