Almatyda radıator jarylyp, kúzetshi áıel kóz jumdy
ALMATY. QazAqparat - Almatyda «Arzan» saýda úıinde bolǵan jarylystan kúzetshi áıel qaıtys boldy, dep habarlaıdy QazAqparat tilshisi.
Aıta ketý kerek, qaıǵyly jaǵdaı ótken jyldyń 23 jeltoqsanynda bolǵan. Degenmen, oqıǵa BAQ ókilderine búgin belgili boldy. Aqparatty qalalyq TJD baspasóz qyzmeti rastady.
23 jeltoqsan kúni Kablýkov kóshesi, 6 mekenjaıynda ornalasqan «Arzan» saýda úıiniń qyzmetkerlerge arnalǵan bólmesinde maımen jumys jasaıtyn radıator jarylǵan. Jylytqysh kúzetshi áıel Maıra Adaevanyń ústeliniń astynda turǵan. Jarylystan soń maı órtene jónelgen. Kúzetshi áıeldiń denesiniń 80 paıyzyn kúıik shalyp, Shuǵyl medıtsınalyq qyzmet kórsetý aýrýhanasyna jetkizildi. Áıel 6 kún ótken soń 30 jeltoqsanda aýrýhanada qaıtys boldy.
«Órt shyqqanda avtomatty órt sóndirý júıesi iske qosylǵan. Sonyń arqasynda tez arada jalyn bir bólmeden shyqpaı sóndirildi. Órtti kúzetshilerdiń ózderi TJD qyzmetkerleri kelgenshe órt sóndirý quralymen óshirip qoıǵan. Tilsiz jaý bir sharshy metr aýmaqty sharpyǵan. Zerthana mamandary teksere kele jylytqyshtyń tikeleı tokqa qosylyp turǵanyn anyqtaǵan. Eger termoregýlıatorǵa jalǵanyp tursa, quryl qyzyp ketpeıtin edi», - dedi TJD baspasóz qyzmetinen.
Іs materıaldary polıtsııaǵa joldandy. Quzyrly organnnyń habarlaýynsha, saýda úıi 2018 jyly eki ret tekserilgen. Bir tekserý barysynda 7 zańbuzýshylyq anyqtalǵan. Bul olqylyqtar úshin saýda úıiniń basshylyǵy ákimshilik jaýapkershilikke tartyldy. Ekinshi tekserý qorytyndy retinde júrgizilgen.
2016 jyly TJD osy saýda úıinde avtomatty órt sóndirý júıesiniń joqtyǵyn synǵa alyp, sotqa bergen bolatyn. Sot arqyly júıeni ornatý maqsatynda saýda úıi jabylǵan bolatyn.
Aıta ketý kerek, ótken jyly 183 saýda úıi, bazarlar men sýpermarketter tekserildi. Tekserý nátıjesinde 2 myńǵa jýyq quqyqbuzýshylyq anyqtaldy. Olarǵa 5 mln 729 myń teńge aıyppul salyndy.
