Almatyda R. Sherdebaevtyń «Munaı: keshe, búgin, erteń» atty kitabynyń tanystyrylymy ótti
ALMATY. Qarashanyń 12-si. QazAqparat /Erbol Azanbek/ - Búgin Almatydaǵy Q.Sátbaev atyndaǵy Qazaq ulttyq polıtehnıkalyq ýnıversıtetinde memleket jáne qoǵam qaıratkeri Ravıl Sherdebaevtyń orys tilinde jaryq kórgen «Munaı: keshe, búgin, erteń» atty kitabynyń tanystyrylymy ótti,
dep habarlaıdy QazAqparat.
Avtordyń aıtýynsha, shyǵarma Qazaq munaıynyń 110 jyldyǵy qarsańynda munaıdyń ótkeni men keleshegine sholý jasaý, jas urpaqqa jetkizý maqsatynda jazylǵan. Kitaptyń tanystyrylymyna QazUÝ rektory B. Jumaǵulov, QR Jumys berýshiler konfederatsııasynyń basqarma tóraǵasy K.Báıkenov, munaı salasynyń ardageri, akademık N.Nádirov syndy belgili qoǵam qaıratkerleri, ǵalymdar, stýdentter qatysyp, kitap turǵysynda óz oılaryn bildirdi.
Ál-Farabı atyndaǵy QazUÝ rektory, Ulttyq ınjenerlik akademııanyń prezıdenti Baqytjan Jumaǵulovtyń sózine qaraǵanda, bul - Qazaqstan tarıhynda munaı salasyndaǵy iri týyndy. «Kitapta munaı sóziniń shyǵýynan bastap, alǵashqy munaı kompanııalary, qazirgi kezeńi, bolashaǵy tereń zerttelgen. Ravıl Tájiqaraulynyń bul eńbegi sózsiz úlken shyǵarma dep baǵalaýǵa bolady», dedi ol.
Ravıl Sherdebaev ekonomıka ǵylymynyń doktory, professor, halyqaralyq mıneraldyq resýrstar akademııasynyń akademıgi, halyqaralyq ınjenerlik jáne ekonomıkalyq eýrazııa akademııalarynyń akademıgi. Munaıshylar otbasynan shyqqan ol Qazaqstannyń Ýkraına men Moldovadaǵy elshisi, Atyraý oblysynyń ákimi, Qazaqstannyń munaı jáne gaz ónerkásibiniń tuńǵysh mınıstri, QR Parlamentiniń depýtaty, «Teńizshevroıl» birikken kompanııasynyń tuńǵysh prezıdenti qyzmetterin atqarǵan.
