Almatyda pyshaqpen qarýlanǵan tonaýshyny polıtseı qolǵa túsirdi
ALMATY. QazAqparat – 7 mamyr – Otan qorǵaýshy kúninde el tynyshtyǵy men qaýipsizdigin kúzetip júrgen polıtsııa qyzmetkerleriniń eńbegin atap ótpese bolmas.
Qyzmettik boryshyn abyroımen atqaryp júrgen polıtsııa qyzmetkerleriniń qatarynda Túrksib aýdandyq PB qyzmetkeri Elmurat Omar da bar.
Aǵa leıtenant sýyq qarýmen qarýlanǵan qylmyskerdi ustap, dúkenshini qaýipten qutqardy.
Byltyr 14 maýsymda keshki saǵat 20.15-te bir er adam Túrksib aýdanyndaǵy Rıhard Zorge kóshesi, 8-úıde ornalasqan «Nıva» shaǵyn azyq-túlik dúkenine kirip dúkenshini pyshaqpen qorqytyp, uryp-soǵyp, odan aqsha talap etken.
Dúkenge kelgen áıelderdiń biri sol jerden sytylyp shyǵyp daladaǵylardan kómek suraı bastaıdy. Sol sátte dúken janynan ketip bara jatqan polıtsııa aǵa leıtenanty Elmurat Omar oılanbastan ishke kirip, uryǵa tý syrtynan tap bergen. Ol urynyń qolynan pyshaqty julyp alyp, edenge qulatady.
Ustalǵan kúdikti osyǵan uqsas qylmystary úshin buryn sottalǵan adam bolyp shyqty.
Almaty qalasy PD Túrksib aýdany PB Krımınaldyq polıtsııa bóliminiń jedel ýákili Elmurat Omar 1995 jyly Almaty oblysy, Eńbekshiqazaq aýdany, Shelek aýylynda týǵan. Mektep bitirgen soń Almatydaǵy M.Esbolatov atyndaǵy QR ІІM akademııasyna oqýǵa túsken. 2017 jyly maýsymda dıplom alyp, polıtsııa leıtenanty shenin ıelengen. Sodan keıin Almaty qalasy PD Túrksib aýdany PB Krımınaldyq polıtsııa bóliminiń jedel ýákili qyzmetine taǵaıyndalǵan.
Qyzmet barysynda QR ІІM alǵys hattarymen, gramotalarymen, «Quqyq tártibin qamtamasyz etýge qosqan úlesi úshin» medalimen marapattalǵan.
