Almatyda psıhonevrologııalyq naýqastar men aýtızmi bar balalarǵa arnalǵan ortalyq ashyldy
ALMATY. QazAqparat - Táýelsizdik kúni qarsańynda Almatyda psıhonevrologııalyq naýqastar men aýtızmi bar balalarǵa arnalǵan ortalyq ashyldy. Qala basshysy Baqytjan Saǵyntaev jańa ońaltý ortalyǵynyń jumysymen tanysty, dep habarlaıdy QazAqparat tilshisi.
Rekonstrýktsııadan keıin burynǵy Áleýmettik ál-aýqat basqarmasynyń ǵımaratynda psıhonevrologııalyq aýrýlary bar 18 jastan asqan adamdarǵa jáne aýtıstik spektri buzylǵan balalarǵa arnalǵan kópbeıindi ońaltý ortalyǵy ashyldy.
Ortalyqta erte qoldaý, oqytý daǵdylaryn damytý, dıagnostıka, qarańǵy jáne jaryq sensorıka kabınetteri jumys isteıdi, defektolog pen logoped keńes beredi.
Budan basqa, ortalyqta tirek-qımyl apparaty buzylǵan jáne psıhonevrologııalyq aýrýlary bar múmkindikteri shekteýli adamdarǵa arnalǵan bólimshe uıymdastyrylǵan, onda jalpy qabyldanǵan ońaltý baǵdarlamalarynan basqa ergoterapııa (aýrýy nemese jaraqattanýy saldarynan qozǵala almaıtyn nemese kúndelikti istermen aınalysa almaıtyn adamdardyń belsendiligin qalpyna keltirý), mehanoterapııa (arnaıy trenajerlardyń kómegimen ońaltý) jáne kınezoterapııa (emdik dene shynyqtyrý nusqalarynyń biri) sııaqty qoldaý baǵdarlamalary jumys isteıdi.
Sondaı-aq, munda B. Ótemuratov qorynyń aýtızmi bar balalardy qoldaý ortalyǵy ornalasqan.
