Almatyda psıhologti soqqyǵa jyqqan er adamǵa sot úkimi shyqty
ALMATY. QazAqparat – Almatyda psıholog Svetlana Bojkony soqqyǵa jyqqan er adam 3 jylǵa sottaldy, dep habarlaıdy QazAqparat tilshisi.
Almaty qalasynyń Túrksib aýdandyq sotynda QR Qylmystyq kodekstiń 293-baby 3-bóliginiń 2-tarmaǵy (buzaqylyq) jáne 107-baptyń 2-bóligi 5-tarmaǵymen (densaýlyqqa qasaqana aýyrlyǵy ortasha zııan keltirý) M.Sabyrbaevqa qatysty qylmystyq is qaraldy.
Eske salaıyq, byltyr 20 shilde kúni psıholog Svetlana Bojko soqqyǵa jyǵylyp, eki ret operatsııa jasalǵan bolatyn. Tamyz aıynda kúdikti retinde 91 jylǵy er adam ustaldy.
«Sot úkimimen Sabyrbaev densaýlyqqa qasaqana aýyrlyǵy ortasha zııan keltirgeni úshin kináli dep tanylyp, ol 3 jyl bas bostandyǵynan aıyryldy. Sottalýshy jazasyn qylmystyq atqarý júıesiniń ortasha qaýipsizdik mekemesinde ótkizedi»,– delingen Almaty qalalyq sot taratqan habarlamada.
Aıta keterligi, materıaldyq jáne moraldyq zalaldy óndirý týraly jábirlenýshiniń shaǵymy jartylaı qanaǵattandyrylyp, 2 mln teńge moraldyq zalal óndirildi.
Sot úkimi zańdy kúshine engen joq.
