Almatyda psıhıkalyq aýrýhanadan qashyp ketken úsh jasóspirim tabylmaı jatyr
ALMATY. QazAqparat - Almatyda psıhologııalyq aýrýhanadan qashyp ketken úsh jasóspirim kesheden beri tabylmaı jatyr, dep habarlaıdy QazAqparat tilshisi.
14 jastaǵy Margarıta Kozlovany anasy dúısenbi kúni Abaı men Seıfýllın qıylysyndaǵy respýblıkalyq psıhologııalyq densaýlyq ortalyǵyna jatqyzǵan.
Anasy Faımanyń aıtýynsha, qyzynyń kózine qos kórine bastaǵan.
«Sársenbi keshki 17:00 shamasynda 13, 16, 14 jastaǵy jasóspirimder aýrýhanadan qashyp ketken. Olardyń qashyp shyqqan sáti syrtqy baqylaý kameralaryna túsip qalǵan.
«Birden polıtsııaǵa habar berildi. Býran ekıpajy kelip, derekti tirkedi. Sodan beri úshinshi táýlikke ketip barady balalar tabylmady. Qasyndaǵy 13 jáne 16 jastaǵy bala men qyz buryn da qashyp úırengen dep estidim. Al meniń qyzym úıden shyqpaıtyn. Meniń oıymsha, ol ana eki balanyń yqpalymen ketti», - dedi Faıma.
Margarıtanyń ústinde jasyl jempir bolǵan. Shashy sary, aqsary qyz. Anasy kórgen adamdar bolsa, habarlasýlaryn ótindi.
Qalalyq ІІD baspasóz qyzmeti habarlaǵandaı, qazir jasóspirimderdi izdestirýmen Almaly aýdandyq ІІD aınalysyp jatyr.
«Úsh patsıent ketip qalǵan. Olardyń sımtomatıkasyna kelsek, olarda dromomanııa belgileri baıqalǵan. Bul úıden ketip qalý, kezbelikke beıimdilik degendi bildiredi. Qazir olardy bizdiń qyzmetkerler de, polıtsııa da izdestirip jatyr», - dedi Respýblıkalyq ǵylymı-praktıkalyq psıhıatrııalyq densaýlyq ortalyǵy bas dırektorynyń orynbasary Qýanysh Altynbekov.
Ortalyqtyń medıtsınalyq qyzmet sapasyn baqylaý bóliminiń basshysy Ajar Ábeevanyń aıtýynsha, atalǵan derek boıynsha qazir ishki tekserý júrip jatyr.
«Bul jerde klınıkalyq protokoldan negizsiz aýytqý deregi boldy ma álde qyzmetkerler mindetin durys atqarmady ma sol máseleler qaralady. Osy tártip buzýshylyqtar tirkelgen anyqtalǵan jaǵdaıda sáıkesinshe shara qabyldanady. Bul jaǵdaıda ishki tártip buzylǵan. Meniń oıymsha, tárbıeshiniń nazaryn ádeıi basqaǵa buryp, urymtal tusty paıdalanǵan jasóspirimder shyǵyp ketken. Balalardyń biri ınıtsıator bolyp, qalǵany onyń artynan erip ketýi múmkin», - dedi Ajar Ábeeva.
