Almatyda professor Z. Qınaıatulynyń 3 birdeı ǵylymı eńbeginiń tusaýy kesildi
ALMATY. 29 qarasha. QazAqparat /Erbol Turymbetov/ - Búgin Almatydaǵy QR Ulttyq kitaphanasynda Sh. Ýálıhanov atyndaǵy Tarıh jáne etnologııa ınstıtýtynyń bas ǵylymı qyzmetkeri, tarıh ǵylymynyń doktory, professor Zardyhan Qınaıatulynyń 70 jyldyǵyna arnalǵan konferentsııa ótti.
Jıyndy Sh. Ýálıhanov atyndaǵy Tarıh jáne etnologııa ınstıtýty uıymdastyrdy.
Shara barysynda ǵalymnyń 3 birdeı eńbeginiń tusaýy kesildi. Olar: «Shyńǵys han jáne Qazaq memleketi» 2 tomdyq ǵylymı zertteýi (monografııa), «Kózqaras» (Ult, tarıh jáne adamdar taǵdyry jaıynda), «Kóshpendilik ǵumyr» (esse).
Z. Qınaıatulynyń «Shyńǵys han jáne Qazaq memleketi» eńbeginde Shyńǵys hannyń shyqqan tegi men keıbir ótkir máselelerge arnalǵan.
«Shyńǵys hannyń dúnıege kelgen mezgili men ol jaıynda ártúrli derektemeler aıtylyp júr. Osyǵan oraı, bul eńbekte tarıhı tulǵa týraly naqty tarıhı derektermen naqty dúnıege kelgen ýaqytyn berýge tyrystym», deıdi kitap avtory.
Z. Qınaıatuly tarıhı Otanyna oralǵaly bergi 16 jyl ishinde 210 baspa tabaq materıal jazyp, 58 baspa tabaqtan turatyn 4 eńbektiń redaktory bolyp, 8 ǵylymı eńbekke jetekshilik etti. Sonymen birge, respýblıkalyq deńgeıdegi 54 konferentsııaǵa qatysyp, baıandamalar jasady, Sh. Ýálıhanov atyndaǵy Tarıh jáne etnologııa ınstıtýtynyń janyndaǵy birikken dıssertatsııalyq keńesti basqardy.
Otyrysta Z. Qınaıatulynyń ómiri men shyǵarmashylyǵy boıynsha slaıd kórsetilip, óleńderi oqyldy. Uıymdastyrýshylar aldaǵy ýaqytta ǵalymnyń 70 jyldyǵyn saltanatty túrde atap ótkeli otyrǵandaryn jetkizdi
