Almatyda professor Dosmuhamed Kishibekovtyń 85 jasqa tolǵan mereıtoıy atalyp ótilýde

Saltanatty jıyndy atalǵan ýnıversıtettiń oqý-tárbıe jónindegi prorektory, professor Ulyqpan Sydyqov óziniń quttyqtaý sózimen ashyp, mereıtoı ıesiniń ǵylym jolynda atqarǵan eńbekterine toqtalyp, jetken jetistikterimen tanystyryp ótti. «Memleketimizdiń baǵa jetpes meıramy Táýelsizdik kúni qarsańynda qazaq halqynyń mańdaıyna bitken, ardaqty da ǵulama ǵalymymyz D. Kishibekov 85 jasqa tolyp otyr. Ol fılosofııa ǵylymynyń kóshbasynda júrgen eńbekqor adam ári ýnıversıtetimizdiń ustazy, QR-nyń joǵarǵy mektebine eńbek sińirgen qyzmetker. Sondyqtan bul toıdy atap ótý biz úshin maqtanysh», - dedi prorektor.

D. Kishibekov 700-den artyq ǵylymı eńbektiń avtory, onyń 50-ge jýyǵy monografııalyq eńbek. Sonymen qatar 30-40 ǵylym kandıdattary men doktorlaryn daıyndaǵan.

"Búgin - Qazaqstan ǵylymynyń erekshe kúni. Bul kisiniń atqarǵan eńbegi orasan, onyń jasaǵan isteri kóp ǵalymdardyń qolynan kele bermeıdi. Ol óte týrashyl adam, sol úshin de qurmetteımin", - dedi QR UǴA-nyń prezıdenti Murat Jurynov.

Jıyn barysynda ýnıversıtettiń eń joǵarǵy nagradasy "Aıryqsha eńbegi úshin" medaly tabystalyp, kóptegen maqtaý qaǵazdarymen marapattaldy. Sondaı-aq atalǵan sharaǵa ýnıversıttettiń oqytýshy jáne professorlar qaýymy men mereıtoı ıesiniń basqa da joǵary oqý oryndaryndaǵy áriptesteri keldi.