Almatyda professor B. Qudaıbergenovtyń 65 jyldyǵyna jáne dintanýlyq bilim berýdiń 10 jyldyǵyna arnalǵan ǵylymı konferentsııa ótti
ALMATY. Qazannyń 26-sy. QazAqparat /Ádilet Musahaev/ - Búgin Almatydaǵy ál-Farabı atyndaǵy Qazaq Ulttyq ýnıversıtetinde fılosofııa ǵylymdarynyń doktory, professor Bilim Qudaıbergenovtyń 65 jyldyǵyna jáne dintanýlyq bilim berýdiń 10 jyldyǵyna arnalǵan «Jańa dinı aǵymdar, qazirgi Qazaqstannyń ulttyq jáne memlekettik biregeıligin saqtaý máseleleri» atty halyqaralyq ǵylymı tájirıbelik konferentsııa ótti.
Atalmysh ýnıversıtettiń ǵylym fılosofııasy jáne dintaný kafedrasynyń meńgerýshisi, fılologııa ǵylymdarynyń doktory, professor Naǵıma Baıtenovanyń aıtýynsha, sharanyń negizgi maqsaty - qazirgi Qazaqstan qoǵamynyń rýhanı áleýmettik damýyndaǵy jańa dinı aǵymdardyń rólin, olardyń ulttyq jáne memlekettik biregeılikke yqpal etý deńgeıin anyqtaý. «Elimizdegi jańa dinı aǵymdardyń qalyptasýy men damý joldaryn, ilimdik jáne ǵuryptyq erekshelikterin taldaý arqyly, olardyń qoǵamdyq sanaǵa, ulttyq jáne memlekettik biregeılikke yqpal-áserlerin aıqyndaý qajet», deıdi N. Baıtenova.
Shara barysynda «Qazaqstandaǵy jańa dinı qozǵalystar: máni men máseleleri», «Jańa dinı aǵymdardyń taralýynyń áleýmettik-saıası jáne etnopsıhologııalyq faktorlary», «Jańa dinı aǵymdar jáne olardyń ulttyq jáne memlekettik biregeıligin saqtaý máseleleri» taqyryptarynda baıandamalar oqylyp, jan-jaqty talqylandy. Sonymen qatar dintaný ǵylymyna úles qosqan ǵalym B.Q.Qudaıbergenovtyń ómirbaıany men onyń atqarǵan eren eńbekteri jaıynda baıandaldalyp, elimizdegi dintaný ǵylymymen aınalysatyn mamandardyń biliktiligin arttyrý máselesi de qaraldy.
Konferentsııaǵa AQSh-tyń Endrıýs ýnıversıtetiniń dintanýshysy Elena Mýzık, elimizdiń UQK akadamııasynyń dintanýshylary men fılosofııa jáne saıasattaný ınstıtýtynyń ókilderi qatysty.
