Almatyda probatsııa esebindegi adamdar kvotamen jumysqa ornalasty

ALMATY. QazAqparat - Almatyda probatsııa esebinde turǵan 11 adam jumysqa ornalasty. Bul týraly óńirlik kommýnıkatsııalar qyzmetinde ótken brıfıngte qalalyq halyqty jumyspen qamtý ortalyǵy dırektorynyń orynbasary Ádilet Jańabaev málim etti, dep habarlaıdy QazAqparat tilshisi.

Spıkerdiń sózinshe, Almaty qalasynyń ákimdigi jylsaıyn halyqtyń jekelegen sanattaryn jumysqa ornalastyrý úshin kvota bóledi, sonyń ishinde buryn sottalǵandar da bar.
«Probatsııa esebinde turǵan adamdardy jumysqa ornalastyrýǵa kvota bólingen. Oǵan 11 uıym engizildi. Probatsııa esebinde turǵan 41 adamdy jáne bas bostandyǵynan aıyrý oryndarynan bosap shyqqan 10 adamdy jumyspen qamtý josparda»,- deıdi Ádilet Jańabaev.
Aıtýynsha, búgingi kúni probatsııa qyzmetiniń esebinde turǵan azamattardyń arasynan 36 adam jumyspen qamtý ortalyǵyna júgingen. Qazir 11 adam jumysqa ornalastyryldy. Onyń ishinde 2 adam turaqty jumysqa, 5 adam ózin-ózi jumyspen qamtýǵa, 4 qoǵamdyq jumys oryndaryna ýaqytsha jumysqa kirdi.
«Jumys izdeýshi retinde tirkelýden 6 adam bas tartty. 17 adam usynylǵan jumys nusqalaryn ýaqtyly habardar etpeý, kelisim bermeý nemese qabyldamaý saldarynan esepten shyǵaryldy. Atalǵan sanattaǵy turǵyndarmen jumys aýdandyq probatsııa qyzmetimen tyǵyz baılanysta júrgiziledi. Jumyspen qamtý ortalyǵy men probatsııa qyzmetiniń ózara árekettesý algorıtmi kelisilgen probatsııa qyzmetkerleriniń qatysýymen kezdesýler ótkizý tájirıbede bar», - deıdi spıker.
Ádilet Jańabaev barlyq suraqtar boıynsha turǵyndar 310-47-82 telefony boıynsha call-baılanys ortalyǵyna habarlasa alatynyn eske saldy.