Almatyda «Prezıdent Joldaýyn júzege asyrý barysyn jarııalaýdaǵy aqparattyq jumys tehnologııasynyń erekshelikteri» dep atalatyn dóńgelek ústel jıyny ótti
ALMATY. Qyrkúıektiń 24-i. QazAqparat /Erlik Erjanuly/ - Joldaýdy júzege asyrý óz deńgeıinde emes. Bul týraly búgin Almatyda "Prezıdent Joldaýyn júzege asyrý barsyn jarııalaýdaǵy aqparattyq jumys tehnologııasynyń erekshelikteri" dep atalatyn dóńgelek ústel jıynynda aıtyldy, dep habarlaıdy QazAqparat.
Ony Mádenıet mınıstrliginiń qoldaýymen Qazaqstan gýmanıtarlyq-saıası konıýnktýra ortalyǵy uıymdastyrǵan bolatyn. Bul jıynǵa saıasattanýshylar, ǵalymdar, táýelsiz jáne memlekettik ǵylymı-zertteý ortalyqtary men saraptamalyq qurlymdarynyń ókilderi qatysty.
"Elbasy halyqqa arnaǵan "Jańa onjyldyq-jańa ekonomıkalyq órleý Qazaqstannyń jańa múmkindikteri" dep atalatyn Joldaýynda el damýynyń qorytyndysyn jasady jáne bolashaqqa arnalǵan maqsat-múddelerdi aıqyndady. Ony júzege asyrý jan-jaqty aqparattyq jumysty talap etedi. Bul shara qatysýshylardyń keń aýqymyn, onyń ishinde memlekettik jáne memlekettik emes ınstıtýttardy da qamtıdy", deıdi Qazaqstan gýmanıtarlyq-saıası konıýnktýra ortalyǵynyń prezıdenti Esenjol Alııarov. Onyń aıtýynsha, bul jıynda Joldaýdyń negizgi bólimderi taldanyp, Qazaqstannyń aqparattyq keńistiginiń jaǵdaıy men onyń damý múmkindikteri qarastyrylady. Sondaı-aq memlekettik ınstıtýttarmen jasalatyn aqparattyq úrdis pen aqparattyq kontenttiń sapasy, BAQ-pen jumysty uıymdastyrý boıynsha tájirıbelik ádistemelerdiń jaı-kúıi jáne damý tásilderi talqylandy.
