Almatyda Prezıdent tapsyrmalaryn júzege asyrý boıynsha jol kartasy ázirlenedi
ALMATY. QazAqparat - Qala ákimi Baqytjan Saǵyntaev QR Prezıdentiniń Tótenshe jaǵdaı jónindegi memlekettik komıssııa jıynynda bergen tapsyrmalaryn júzege asyrý jónindegi qalalyq jedel shtabtyń otyrysyn ótkizdi, dep habarlaıdy QazAqparat tilshisi.
Shahar basshysy Baqytjan Saǵyntaev barlyq mindetterdi bólip, olardy oryndaý boıynsha naqty tapsyrmalar berdi.
Onyń ishindegi eń mańyzdysy – qalanyń karantındik aımaǵyn tolyǵymen qorshaýǵa alý jáne Almatyǵa kez kelgen tásilmen kirip-shyǵý múmkindigin shekteý qolǵa alynbaq.
«Qalaǵa zańsyz kirýge nemese qaladan zańsyz shyǵyp ketýge tyrysqan jandarǵa karantınniń ortaq ıgiligimiz úshin engizilgenin jetkize túsindirý kerek. Adamdardyń densaýlyǵy men ómirin saqtaý mańyzdy bolyp tur. Ol úshin koronavırýstyq ınfektsııanyń taralýyna jol bermeýimiz kerek. Biz Eýropa elderinde asyqpaýshylyqtyń saldarynan qaýipti vırýstyń pandemııasy taralǵanyn bilemiz. Osydan qorytyndy shyǵaryp, onyń aldyn alý boıynsha áreket etýdemiz», – dedi Baqytjan Saǵyntaev.
Memleket basshysy tapsyrǵan is-sharalardyń ishinde karantınge jatqyzylǵan adamdardyń karantın talabyn buzǵany úshin jaza qoldaný tıistigi aıtylǵan.
Budan ózge qoǵamdyq keńistikte patrýldik sholý, jaryqtandyrý jáne beınebaqylaýmen jabdyqtaý boıynsha sharalar kúsheıtiledi.
Sondaı-aq halyq júretin qoǵamdyq nysandarda sanıtarlyq óńdeý jumystary júrgizile beredi. Barlyq HQKO ýaqytsha jabylady. Qala keńistigin dezınfektsııalaý úshin kommýnaldyq tehnıka qaıta jabdyqtalady.
Túrli qatynas joldary arqyly shet elden, sonyń ishinde EAEO elderinen keletin barlyq jolaýshylardy oqshaýlaý boıynsha jumystar jalǵasa beredi. Sondaı-aq medıtsınalyq mekemelerdiń jumys tártibi týraly túsindirý jumystary jalǵasady. Kásipkerler men azamattar úshin blok-beketterden ótý tártibi men erejeleri týraly jadynamalar ázirlendi.
Sondaı-aq, jastardyń jasampazdyǵyn qamtamasyz etý boıynsha onlaın tártipte túrli jarystar men dárister ótkiziledi. Budan bólek Eńbek jáne halyqty áleýmettik qorǵaý mınıstrligi tótenshe jaǵdaı kezinde eńbekaqydan aıyrylǵan adamdarǵa 1 AÁK (42 500 teńge) kóleminde aılyq tólem júrgizý máselesi pysyqtalmaq.
Kópbalaly otbasylarǵa, múgedekter men halyqtyń áleýmettik osal toptaryna tegin azyq-túlik pen turmystyq jıyntyq taratylmaq.
Ár tapsyrma boıynsha naqty oryndaý sharalary ázirlenetin bolady.
