Almatyda Premer-Mınıstr reprodýktıvti medıtsınanyń jetistikterimen tanysty
ALMATY. QazAqparat - Búgin Almatydaǵy jumys sapary barysynda QR Premer-Mınıstri Baqytjan Saǵyntaev Reprodýktıvti medıtsına jáne gınekologııa ınstıtýtynyń «EKO» ortalyǵyn aralap kórdi, dep habarlaıdy QazAqparat tilshisi.
Bul ortalyqta bedeýlikten emdeýdiń álemdik joǵarǵy tehnologııalary paıdalanylady.
Baqytjan Saǵyntaev tirkeý bólimi men baılanys ortalyǵy, jumys kabınetteri men EKO zerthanalarynyń jumystarymen tanysty.
Instıtýt dırektory Tamara Djýsýbalıeva Premer-Mınıstrge ortalyq, áleýmettik jaýapkershilik aıasyndaǵy atqarylǵan jumystar, urpaq órbitý salasyndaǵy ǵylymı jetistikter týraly baıandady.
2017 jyly Almatyda «EKO» ortalyǵynda 300 almatylyq otbasy medıtsınalyq kómek aldy. 700 otbasy kezekte tur.
Halyqaralyq talaptarǵa saı salynǵan jańa emhana zamanaýı qural-jabdyqtarmen qamtamasyz etilgen.
Ota blogy men embrıologııalyq zerthana emhanadan qashyqta ornalasqan. Óz jeldetý júıesi bar.
Únemi qajetti ylǵaldylyq pen temperatýra mıkroklımatyn ustap turýǵa jaǵdaı jasalǵan. Sonymen qatar, medıtsınalyq mekeme Almatydaǵy medıtsınalyq týrızmniń ortalyǵy ekendigi belgili.
Tamara Djýsýbalıevanyń aıtýynsha, munda kórsetiletin medıtsınalyq kómek sheteldegi medıtsınalyq qyzmetten artyq bolmasa kem emes. Onyń ústine baǵasy da qol jetimdi.
Maman dárigerlerdiń joǵary biliktiligi men Qazaqstan zańnamasynyń tıimdiligi sheteldik klıentterdi tartýda septigin tıgizip otyr.
Sońǵy eki jylda Túrkııa, QHR, Germanııa, Reseı, AQSh-tan kelgen klıentterdiń qatary birneshe ese ósti.
Reprodýktıvtik ınstıtýt jylyna 3000 otbasyna qyzmet kórsete alady.
