Almatyda poıyzdyń áınegin syndyrǵan jolaýshy ustaldy
ASTANA. QazAqparat - Kólik polıtseıleri jolaýshylar poıyzynyń terezesin syndyrǵan Almaty qalasynyń 49 jastaǵy turǵynyn ustady, dep habarlaıdy KІІD-niń qyzmetkerleri.
«Almaty-1» stantsııasy vokzalynda «Pavlodar-Almaty-1» baǵytyndaǵy poıyz toqtap turǵan kezde vagondardyń biriniń tambýrdaǵy terezesin syndyryp ketkendigi anyqtaldy. Almaty-1 stantsııasynyń jelilik ishki ister bóliminiń qyzmetkerleriniń tekserý jumystarynyń barysynda 49 jasar er azamat ustaldy jáne onyń ishimdikke mas ekeni anyqtaldy.
Medıtsınalyq tekserý er azamattyń orta deńgeıdegi masań kúıde ekendigin anyqtady. Atalǵan fakt QR QK-niń 294 baby boıynsha sotqa deıingi tergeý tizimine engizildi. Sonymen qatar ustalǵan azamat QR QK-niń 440 baby, 2 bólimi boıynsha ákimshilik jaýapqa tartyldy.
Kóliktegi ІІD-niń Ákimshilik polıtsııa basqarmasynyń bastyǵy Marat Álkenovtyń aıtýynsha, mundaı jaǵdaılar erekshe nazar aýdarýdy qajet etedi. Óıtkeni zań buzýshy materıaldyq shyǵynmen qatar poıyzdardyń júrý qaýipsizdigine de nuqsan keltiredi jáne jolaýshylar men poıyz qyzmetkerleriniń ómirine qaýip tóndiredi.
Álkenovtyń sózinshe, jyl basynan beri departamenttiń baqylaýyndaǵy aımaqta jolaýshylar poıyzynyń terezesin syndyrýmen baılanysty 46 fakti tirkelgen. Olardyń 5-ýi kámeletke tolmaǵan jastar tarapynan júzege asyrylǵan. Sonymen qatar ol temirjol nysandaryndaǵy zańǵa qarsy áreketter úshin ákimshilik jáne qylmystyq jaýapkershilik qarastyrylǵandyǵyn atap ótti.
