Almatyda poshta qyzmetkerleriniń arasynda tuńǵysh ret «Memlekettik til - meniń tilim» atty respýblıkalyq baıqaý ótip jatyr

       dep habarlaıdy QazAqparat.

Ol Qurmanǵazy atyndaǵy Ulttyq konservatorııada  «Qazposhta» Aktsıonerlik qoǵamynyń uıymdastyrýymen ótýde.

«Bul sharany alǵash ret poshta salasynda memlekettik tildiń qoldanysyn arttyrý maqsatynda bizde jumys atqaryp jatqan ózge ult ókilderi arasynda   ótkizip otyrmyz. Negizgi maqsatymyz - búgingi tańda ózekti bolyp otyrǵan qazaq tiliniń qoǵamdaǵy orny jónindegi kókeıkesti máselege sergektik tanytý, memlekettik tildiń damýyna úles qosý, poshta salasynda eńbek etetin ulty ózge jumyskerlerdi memlekettik tildi úırenýge yntalandyrý», deıdi «Qazposhta» Aktsıonerlik qoǵamy Basqarma tóraǵasynyń orynbasary Sıyrbaev Erserik.

Aqtyq synǵa 2 aı boıy ótken saıystyń aldymen aýdan, odan keıin oblys jeńimpazdary atanǵan, barlyǵy 16 talapker, ár túrli ult ókilderi qatysýda.  Qatysýshylar memlekettik tilde test tapsyryp, qazaq tilinde jatyq sóıleý, sóz tapqyrlyq, ulttyq salt-dástúr boıynsha synǵa túsýde jáne óz kásibi jónindegi bilimderin de ortaǵa salýda. Alty kezeńnen turatyn baıqaý jeńimpazdary baǵaly syılyqtarmen marapattalatyn bolady.