Almatyda «Porshe Cayen» 55 jastaǵy er adamdy qaǵyp óltirdi
ALMATY. QazAqparat - Almatyda «Porshe Cayen» júrgizýshisi 55 jastaǵy er adamdy qaǵyp óltirdi. Bul týraly QazAqparat tilshisine qalalyq Polıtsııa departamentiniń resmı ókili Saltanat Ázirbek málim etti.
Jol apaty búgin tańerteń Q.Sátbaev kóshesiniń boıynda, Respýblıka alańynda bolǵan.
«Porshe Cayen» kóligin tizgindegen 36 jastaǵy júrgizýshi Q.Sátbaev kóshesimen batysqa baǵyt alǵan. Respýblıka alańynda 50-55 jastar shamasyndaǵy er adam tyıym salynǵan jerden ótip bara jatqan. Sol sátte júrgizýshi tejegishti basyp úlgermeı qaǵyp ketken.
Er adam sol jerde kóz jumǵan. Qazir onyń kim ekendigi anyqtalyp jatyr. Polıtsııa atalǵan derekke baılanysty QR QK 345-babynyń 3-bólimi boıynsha sotqa deıingi tergeý isin tirkedi», - dedi Saltanat Ázirbek.
