Almatyda polıomıelıtke qarsy aldyn alý sharalary júrgizilýde
ALMATY. Mamyrdyń 20-sy. QazAqparat /Názıra Eleýhan/ - Polıomıelıtke qarsy vaktsına Almaty qalasynda jetkilikti. Balalardy qabyldaý jáne taratý ortalyǵynda 15 jasqa deıingi 37 jasóspirim jáne Tájikstannan kelgen 4 bala polıomıelıtke qarsy egildi.
Qazirgi kezde bul ınfektsııalyq dert oryn alǵan jerge bara jatqan adamdar ózderi habarlasyp, egilýde. Bul týraly búgin Almatyda «Polıomıelıt juqpasymen kúreske Qazaqstannyń daıyndyǵy» taqyrybynda ótken baspasóz máslıhatynda Almaty qalalyq memlekettik sanıtarlyq-epıdemıologııalyq qadaǵalaý departamentiniń epıdemıologııalyq qadaǵalaý bóliminiń bastyǵy Sáýle Nurǵalıeva málim etti, dep habarlaıdy QazAqparat.
Onyń aıtýynsha, Qazaqstanǵa kelip, kóshi-qon polıtsııasynda ýaqytsha tirkeýde turǵan 1001 azamattyń 9- balasyna da polıomıelıtke qarsy egý jumystary júrgizilgen. «Biraq, bizde tirkeýde joq qanshama adamdar bar. Biz sondyqtan, qazir Almaty qalasynyń ІІD qyzmetkerlerimen tirkeýde joq azamattardy anyqtaýdamyz», dedi ol.
Ol sonymen qatar, ımmýnıtetti kóterýge baılanysty sharalardyń da atqarylyp jatqandyǵyn jetkizdi. «Oǵan bizge 151 000 bala bólindi. 52 ata-ana egýge qarsylyq bildirgendikten, biz barlyq ata-analarǵa túsindirme jumystaryn júrgizýdemiz jáne olarǵa «egý - polıomıelıtke qarsy eń tıimdi jol» dep aıtqymyz keledi», dep atap ótti Sáýle Nurǵalıeva. Onyń aıtýynsha, Ulttyq josparǵa baılanysty ımmýnıtettiń joǵary, tómendigin bilý úshin, sondaı-aq, vaktsınanyń áserin anyqtaý maqsatynda egilgen balalarǵa zertteýler júrgiziledi. «Qazir oǵan 5 bala tańdap alyndy», dedi Sáýle Nurǵalıeva.
Jıyn barysynda Salaýatty ómir saltyn qalyptastyrý problemalarynyń Ulttyq ortalyǵy dırektorynyń orynbasary Tatıana Slajneva: «Ár adam bul aýrýdyń qaýiptiligin sezinip, jaýapkershilikpen qaraýy kerek, balalardy qorǵaý úshin aldyn alý sharalaryn qoldaný kerek», dep atap ótti.
«1988 jyly polıomıelıtke shaldyqqan 125 el bolatyn. Qazirgi ýaqytta álemniń 4 elinde: Aýǵanstan, Pákistan, Úndistan jáne Nıgerııada polıomıelıt áli joıylǵan joq. Sońǵy ýaqyttary, Tájikstan, Reseı elderinde polıomıelıt jaǵdaıy tirkelgendikten, bizdiń elge de qaýip bar. Sondyqtan, biz de aldyn alý sharalaryn júrgizýdemiz. Áýejaılar men temirjol vokzaldarynda sanıtarlyq-karantındik baqylaýdy kúsheıttik, sal aýrýynyń Qazaqstandaǵy, sondaı-aq, dert tirkelgen elderdegi epıdemıologııalyq ahýaldyń monıtorıngi júrgizilýde, ár túrli sebeptermen egilmeı qalǵan balalar anyqtalýda», dedi Qazaq Respýblıkalyq sanıtarlyq-epıdemıologııalyq stansysynyń dırektory Baýyrjan Baıserkın. Onyń aıtýynsha, barlyq medıtsınalyq mekemeler daıyndyq jumystaryn júrgizip boldy.
Anyqtama: Polıomıelıt - sal aýrýyn týyndatyp, kóbine aıaq pen dene bulshyq etteriniń qyzmetin buzatyn, júıke júıesin zaqymdaıtyn, jedel damıtyn juqpaly dert.
Juqpa taǵam, sý, turmystyq qarym-qatynas arqyly, sırek jaǵdaıda aýa-tamshyly jolmen beriledi. Polıomıelıttiń qozdyrýshysy sýda, sútte, aǵyn sýlarda uzaq ýaqyt saqtalady, al qaınatsa óledi.
Polıomıelıtke barlyq jastaǵy adamdar, jıi jaǵdaıda 15 jasqa deıingi balalar shaldyǵýy múmkin. Bul dertten qorǵaıtyn jalǵyz qural - der kezinde egilý bolyp tabylady.
Profılaktıkalyq egýlerdiń Ulttyq kúntizbesine sáıkes vaktsınatsııalaý 2, 3, 4, jáne 12-15 aılyq merzimderde ótkiziledi. Immýnızatsııalaý úshin DDU kepildi sapa sertıfıkaty berilgen polıomıelıtke qarsy vaktsına paıdalanylady.
