Almatyda polıtsııaǵa jumysqa ornalasý úshin qujattar front-keńselerde qabyldanady

ALMATY. QazAqparat – Almatyda polıtsııaǵa jumysqa ornalasý úshin qajetti qujattar front-keńselerde qabyldanady. Pılottyq joba Túrksib aýdandyq polıtsııa bóliminde júzege asyrylýda, dep habarlaıdy QazAqparat tilshisi.

«QR ІІM tapsyrmasyna sáıkes ishki ister organdaryna jumysqa ornalasýǵa kelgen úmitkerlerdi irikteýde jáne zerdeleýde ashyqtyqty qamtamasyz etý sharalary keshendi júrgiziledi. Maqsat – azamattardyń kadr qyzmetkerlerimen baılanysyn azaıtý jáne sybaılas jemqorlyqtyń aldyn alý. Front-keńse polıtsııa qyzmetkeri bolǵysy keletin azamattardan (tegin jumysqa ornalasý úshin) qujattardy alýǵa baǵyttalǵan. Qujatty qabyldaýǵa bilikti mamandar tartyldy. Olar úmitkerlermen túsindirý jumystaryn júrgizedi, qyzmetke kirý sharttaryn túsindiredi jáne kelip túsken ótinishterdi naqty esepke alady», - dedi Almaty Polıtsııa departamenti bastyǵynyń orynbasary Erjan Orazbekov.

Eske salaıyq, azamattardyń senimin arttyrý úshin Almaty polıtsııasy birtindep qyzmet kórsetý modeline kóshýde. Qala ákimdiginiń qoldaýymen qazir barlyq aýdandyq polıtsııa bólimderinde front-keńselerdiń qurylysy júrip jatyr.