Almatyda polıtsııaǵa toqtamaı kóligimen qashqan júrgizýshige 15 ákimshilik hattama toltyryldy
ALMATY. QazAqparat - Almatyda júrgizýshi kýáligi joq azamat polıtseılerden qashyp qutylmaq boldy, dep habarlaıdy QazAqparat tilshisi.
Áleýmettik jelide bir kóshede kóptegen patrýldik kóliktiń turǵan vıdeosy jarııalandy. Kýágerlerdiń aıtýynsha munda shamamen 20-ǵa jýyq mashına kelgen.
Qalalyq Polıtsııa departamentiniń ókilderi búgin tańerteń ál-Farabı dańǵyly men Ǵ.Mustafın kóshesiniń qıylysynda «Mercedes» kóliginiń júrgizýshi qatty jyldamdyqpen qaýipti manevrler jasaǵanyn aıtty.
«Júrgizýshi polıtsııa qyzmetkerleriniń kólikti toqtatý jónindegi eskertýin elemeı, kerisinshe, jyldamdyqty qosa túsken. Osyǵan baılanystyń onyń sońyna birneshe polıtsııa kóligi túsip, kólikti qorshaýǵa alyp, onyń odan ári qozǵalysyna jol bermedi. Rýlde 1992 jyly týǵan azamat boldy. 2020 jyly qyrkúıekte mas kúıinde kólik júrgizgeni úshin sot júrgizýshi kýáliginen bir jarym jylǵa aıyrǵany belgili boldy. Búgin dárigerler onyń esirtkige masań kúıde bolǵanyn rastady. Atalǵan derek boıynsha QR Qylmystyq kodeksiniń 346-baby boıynsha sotqa deıingi tergeý bastaldy. Kúdikti ustalyp, ýaqytsha ustaý ızolıatoryna qamaldy», - dedi Almaty qalasy ІІD tergeý basqarmasyyń bastyǵy Oljas Sháripov.
Sonymen qatar, jergilikti polıtsııa basqarmasynyń bastyǵy Manap Sattarov oǵan qatysty 15 ákimshilik hattama toltyrylǵanyn málim etti.
