Almatyda polıtsııadan qashqan mas júrgizýshi jol apatyna tústi
ALMATY. QazAqparat– Almatyda polıtsııadan qashqan mas júrgizýshi, iri jol apatyn jasady, dep habarlaıdy QazAqparat tilshisi.
Qalalyq Polıtsııa departamenti málim etkendeı, Abaı men Dostyq dańǵyldarynyń qıylysynda «Leksýs» avtokóligi potrýldik polıtsııanyń nazaryna ilikti. Atalǵan kóliktiń júrgizýshisi A. esimdi azamat tártip saqshylarynyń talaptaryna baǵynbaǵan.
«Birinshiden, avtokólik júrgizýshisiniń agressıvti áreketter jasap polıtsııa qyzmetkerleriniń nazaryn aýdardy. Biraq júrgizýshi olardyń jaǵdaıǵa qatysty talaptaryna baǵynbaı, polıtsııadan qashqan. Sol kezde sol baǵytta kele jatqan eki kólikpen soqtyǵysty. Sot-narkologııalyq saraptama onyń alkogoldik masań kúıde ekenin anyqtady»,– dedi Medeý aýdandyq polıtsııa basqarmasynyń bastyǵy Dáýren Ótebaev.
Almaty qalasynyń mamandandyrylǵan aýdanaralyq ákimshilik sotynyń qaýlysymen quqyq buzýshy toǵyz jyl merzimge kólik quralyn basqarý quqyǵynan aıyryldy, sondaı-aq, 25 táýlikke ákimshilik qamaýǵa alyndy.
Sonymen qatar, apat bolǵan jerden ketip qalǵany úshin kúdiktige 50 aılyq eseptik kórsetkish kóleminde aıyppul salyndy.
Quqyq buzýshy ákimshilik qamaýǵa alynǵandarǵa arnalǵan PD-nyń mamandandyrylǵan qabyldaý ornyna ornalastyryldy.
