Almatyda polıtsııa ustap alyp ketken múgedek adam joǵalyp ketti
ALMATY. QazAqparat - Almatyda múgedek er adamnyń joǵalyp ketkeni týraly onyń týystary Instagram áleýmettik jelisinde habarlady.
«Aǵamyzdyń joǵalyp ketkenine 5 kún ótti. Quzyrly organdardyń izdeý jumystarynan nátıje kóre almaı otyrǵandyqtan, bar bilgenimdi ortaǵa salǵym keledi. Osylaı, múmkin, basymyzǵa túsken qıyn iske qoǵam nazaryn aýdartarmyz. Bizdiń aǵamyz múgedek jan, dúkenge shyǵyp ketken. Ony kósheden polıtseıler ustap alyp, aty-jónin anyqtaý úshin bólimshege alyp ketipti. Osydan keıin ony Kablýkova kóshesindegi júıke naýqasyn emdeıtin aýrýhanaǵa aparǵan. Ol jerde aǵamyzdy dárigerler qarap, qaıtaryp jibergen. Osydan keıin ol iz-túzsiz joǵalyp ketti. Oqıǵanyń men aıtyp otyrǵan jelisin birden anyqtaǵanymyz joq. Sebebi, ony ustap alǵan polıtseıler de, qaraǵan dárigerler de bizge habarlasqan joq. Ony pogon taqqandardyń alyp ketkeni týraly biz dúken satýshysynan bildik. Bul zańsyzdyqtan keıin men endi kimge aryzdanarymdy bilmeımin. Sondyqtan, iske qoǵam nazaryn aýdartqym keledi. AІІB-ǵa biz aryz da jazdyq», - deıdi joǵalǵan er adamnyń jıeni Anel Nurbekova.
