Almatyda polıtsııa podpolkovnıgi soqqyǵa jyǵyldy
ALMATY. QazAqparat - Áleýmettik jelide Almatyda polıtsııa qyzmetkeriniń soqqyǵa jyǵylǵany týraly aqparat tarady. Polıtsııada oqıǵa boıynsha tergeý bastalǵanyn málim etti, dep habarlaıdy QazAqparat tilshisi.
Qalalyq polıtsııa departamentiniń málimetinshe, oqıǵa 9 qazanda, túngi saǵat 00:30 shamasynda «Panorama» meıramhanasynyń janynda bolǵan.
Belgisiz adamdar Almaty qalasynyń polıtsııa departamentiniń Ózindik qaýipsizdik basqarmasynyń aǵa ýákili, polıtsııa podpolkovnıgi R. Ótegenovti soqqyǵa jyqqan.
Ol «jabyq bas súıek - mıdyń jaraqaty, mıdyń shaıqalýy»dıagnozymen №12 ortalyq qalalyq klınıkalyq aýrýhanaǵa jatqyzyldy. Sondaı-aq kóptegen gematoma men synyqtar da boldy.
«Bul fakt Qylmystyq kodekstiń 293-babynyń 2-bóligi boıynsha tirkeldi. Qylmysty jasady degen kúdikpen 5 er adam ustaldy. Olar ýaqytsha ustaý ızolıatoryna qamaldy. Tergeý jalǵasýda», - dedi polıtsııa departamenti.
