Almatyda polıtsııa mektepke barmaǵan birneshe balany tapty
ALMATY. QazAqparat - Almatyda shuǵyl aldyn alý sharalary ótip jatyr. 5 kúnnen beri ıývenaldy polıtsııa qyzmetkerleri mektepke barmaǵan balalardy anyqtaýda, dep habarlaıdy QazAqparat tilshisi.
Jasóspirimder arasyndaǵy quqyqbuzýshylyqtar men qylmystyń aldyn alý maqsatynda 20-24 tamyz aralyǵynda «Jasópirim men kóshe» shuǵyl sharasy ótkizilýde.
«Tekseris barysynda Naýryzbaı aýdandyq bólim qyzmetkerleri kámelettik jasqa tolmaǵandarǵa temeki ónimderin satqan dúkendi anyqtady. Jasóspirimniń aıtýynsha, ol dúkennen temekini kúnde satyp alatyn bolǵan. Sondaı-aq Jetisý aýdandyq ıývenaldy polıtsııa qyzmetkerlerimen qala bazarlarynyń birinde ata -anasynyń qaraýynsyz júrgen, jazǵy kanıkýl kezinde saýdamen aınalysqan 3 jasóspirim tabyldy. Olar Almatyǵa basqa óńirden kelgen. Jeke basyn anyqtap, ata-analaryna tapsyrý úshin olar kámelettik jasqa tolmaǵandardyń beıimdelý ortalyǵyna berildi. Ata-analary óz mindetine salǵyrt qaraǵany úshin ákimshilik jaýapkershilikke tartylatyn bolady», - dedi Almaty ІІD jergilikti polıtsııa qyzmetiniń ıývenaldy polıtsııa bóliminiń bastyǵy Leıla Álipbaeva.
Sondaı-aq Túrkisib aýdandyq ІІB qyzmetkerleri jaǵdaıy nashar ári az qamtylǵan otbasylardy aralady. Shara barysynda kámeletke tolmaǵan 3 balasy bar áıeldiń páter jaldap turatyny belgili bolǵan. Bul balalar sabaqqa da barmaǵan eken.
«1 tamyzdan bastap 30 qyrkúıekke deıin búkilrespýblıkalyq «Mektepke jol» aktsııasy bastalǵan bolatyn. Shara aıasynda álgi áıelge balalaryn mektepke ornalastyrýda qujattaryn jasaýǵa kómek kórsetilip, aýdandyq bilim bólimine tapsyrylady. Budan ózge keńselik taýarlar, mektep formasymen qamtamasyz etemiz. Taǵy aıta ketý kerek, Ákimshilik quqyq buzýshylyq týraly zańnyń 127-babyna sáıkes, ata-ana nemese basqa da balalardy tárbıeleý jónindegi mindetterdi oryndamaǵan zańdy ókilder, sondaı-aq jasy 18-ge tolmaǵan balalarǵa temeki ónimderin satqan tulǵalar ákimshilik jaýapkershilikke tartylady»,-dedi Leıla Álipbaeva.
