Almatyda polıtsııa qyzmetkerleri órtenip jatqan úıden 6 adamdy qutqardy
ALMATY. QazAqparat - Ótken túni saǵat 4-te Túrksib aýdanynda túngi torýyl kezinde «Boran-268» ekıpajynyń polıtseıleri Seıfýllın kóshesinde órtenip jatqan úıden 6 adamdy qutqardy. Bul týraly qalalyq ІІD baspasóz qyzmeti habarlady.
«Birinshi qabattaǵy páter órtenip jatty. Qoıý tútinnen kórý múmkin emes boldy. Ekinshi qabattan kómekke shaqyrǵan daýysty estip, qasymdaǵy áriptesim ekeýmiz baspaldaq ákelip bir otbasy múshelerin, ákesin, nárestesimen anasyn, qyzyn jerge túsirdik. Keıin qasyndaǵy balkonnan kómekke shaqyrǵan qart áıel men onyń ulyn qutqardyq, - dedi «Boran-268» ekıpajynyń jetekshisi, polıtsııa aǵa leıtenant Aıbol Ahmetshıev.
Órt shyqqan páter túgelimen janyp ketken. Polıtsııanyń aıtýynsha, ol páterde buryn birneshe ret sottalǵan er adam men ishimdikke áýes kóńildesi turǵan.
«Órttiń tutanýyna olardyń kóńildi otyrystary áser etýi múmkin. Qalǵan páterler ishinara zaqymdanǵan», - dedi qalalyq ІІD jol-torýyl polıtsııasynyń polk komandıri Aıtjan Álmuhanbetov.
Aman qalǵan turǵyndar der kezinde kómek qolyn sozǵan polıtsııa qyzmetkerlerine rızalyǵyn bildirýde.
