Almatyda polıtsııa qyzmetkeri abaısyzda áriptesin atyp tastady
ALMATY. QazAqparat - Almatyda polıtsııa qyzmetkeri óz áriptesin atyp tastady, dep habarlaıdy QazAqparat tilshisi.
Bul týraly aqparat áýeli Kozachkov Telegram kanalynda paıda boldy.
Taraǵan aqparat boıynsha, oq atqan - 28 jastaǵy serjant. Ol jábirlenýshimen birge tamaqtanatyn bólmede otyrǵan.
Oq PM qyzmettik qarýynan atylǵan. Qyzmetker alǵan jaraqatynan sol jerde mert boldy.
Kýágerdiń aıtýynsha, polıtseıler arasynda janjal bolmaǵan, olar jaı sóılesip otyrǵan.
Almaty qalalyq polıtsııa departamenti aqparatty rastady.
Vedomstvo málimetinshe, oqıǵa 5 maýsymda bolǵan. Polıtsııa qyzmetkeri qyzmettik qarýmen abaısyzda óz áriptesine oq atqan, jábirlenýshi alǵan jaraqatynan qaıtys bolǵan.
«Atalǵan derek QR QK 104-baby boıynsha sotqa deıingi tergeýdiń biryńǵaı tizilimine tirkeldi. Tıisti saraptamalar taǵaıyndaldy»,- dep habarlady vedomstvodan.
