Almatyda polıtsııa basshylaryn daıarlaý fakýlteti ashyldy
ІІM M. Esbolatov atyndaǵy Almaty akademııasynda onlaın rejımde ishki ister organdarynyń basshy quramyn daıarlaý fakýltetiniń ashylýy ótti. Fakýltet tyńdaýshylaryn alǵashqy qabyldaý aldynda Іshki ister mınıstri Erlan Turǵymbaev quttyqtaý sóz sóıledi.
«ІІM Prezıdenttiń tapsyrmasyna sáıkes ishki ister organdaryn jańǵyrtý boıynsha júıeli jumys júrgizýde. Ol, eń aldymen, polıtsııanyń ashyqtyǵyn qamtamasyz etýge, azamattardyń senim deńgeıin arttyrýǵa jáne olardyń konstıtýtsııalyq quqyqtaryn qorǵaýǵa baǵyttalǵan. Osyǵan baılanysty kadr jumysyna jáne tártip saqshylarynyń biliktiligin arttyrýǵa úlken mán beriledi», – dedi mınıstr Erlan Turǵymbaev.
Polıtsııa vedomstvosynyń basshysy jańa fakýltettiń ashylýynyń aldynda úlken taldaý jumystary júrgizilgenin atap ótti. – Іshki ister mınıstrlikteriniń basshy quramyn daıarlaý boıynsha arnaıy oqý oryndarynyń álemdik praktıkasy zerdelendi. Ulybrıtanııa, Germanııa, Japonııa jáne Reseıdiń ozyq tájirıbesi negizge alyndy. Atalǵan elderde basshylyq quram basqarýshylyq, tehnıkalyq jáne kommýnıkatıvtik daǵdylardy, kóshbasshylyq qabiletterdi damytý boıynsha júıeli túrde oqytylady, – dedi mınıstr Erlan Turǵymbaev. Oqý baǵdarlamasy úsh aıǵa eseptelgen. Fakýltet tyńdaýshylary aýqymdy baǵyttar boıynsha (geosaıasat, jobalyq basqarý, qyzmetkerlermen jumys, psıhologııalyq daıyndyq, IT-saýattylyq, qarjylyq saýattylyq) 12 modýldi oqıdy. Kýrsty jaqsy aıaqtaý mansaptyq ósý, ІІM ortalyq apparaty departamentteriniń basshylary men aýmaqtyq bólinisterdiń birinshi basshylary laýazymdaryna qyzmetke taǵaıyndaý kezinde óz septigin tıgizetin bolady.
«Kún saıyn damyp, ózgerip jatqan álemde polıtsııa burynǵy qalpynda qalyp qoımaýy kerek. Іshki ister organdarynyń qyzmetkerleri únemi izdeniste bolyp, jan-jaqty damýy qajet. Sondyqtan da birinshi basshylar jeke quram úshin árdaıym úlgi bolady», – dep tolyqtyrdy Erlan Turǵymbaev.