Almatyda polıtsııa avtobýstaǵy qalta urylaryn qolǵa túsirdi
ALMATY. QazAqparat - Almaty qalalyq ІІD Krımınaldy polıtsııa basqarmasynyń qyzmetkerleri qalta urylaryn qolǵa túsirdi, dep habarlaıdy QazAqparat tilshisi.
Tártip saqshylary qolǵa túsirgen eki urynyń biri - kelinshek. Ol janyndaǵy sybaılasyn saqtandyrý úshin erip júrgen.
«135 baǵdardaǵy avtobýsta O. esimdi azamatshanyń «Samsýng» markaly uıaly telefony urlanǵan. Polıtseıler kúdiktilerdi izin sýytpaı tapty. Olar qoǵamdyq kólikke urlyq jasaý úshin otyrǵan. Kúdiktiniń biri - er adam jolaýshynyń qaltasyna qol suqqan kezde, qasyndaǵy áıel ony qalqalap, azamatshany sózben aldaýsyratyp turǵan. Qazir ustalǵandardyń buryn qylmystyq iske qatysy bary-joqtyǵyn tekserýdemiz. Olar óz aıyptaryn moıyndap, zattaı aıǵaqtardy qaıtardy», - dedi Almaty ІІD Krımınaldy polıtsııa basqarmasynyń basshysy Esen Ysqaqov.
Dál osy ýaqytta basqa baǵyttaǵy avtobýsta polıtsııa taǵy bir uryny qylmys ústinde ustaǵan. Alǵashqy tergeý júrgizý kezinde kúdiktiden urlanǵan telefon tabyldy.
«Qalta urlyǵy ádettegideı jolmen jasalǵan. Jábirlenýshi basqa jaqqa alańdap turǵanda qylmysker onyń sómkesine qol salady da aqshaly ámııandy alady. Bul oqıǵa 106 qalalyq marshrýtta bolǵan. Qylmystyq iske baılanysty QR QK-niń 188-baby boıynsha M.Áýezov jáne Jetisý aýdandyq ІІB tergeýshileri sotqa deıin tergeý júrgizýde», - dedi E.Ysqaqov.
Osy oraıda Almaty polıtsııasy saq bolýdy eskertedi.
«Oqý jyly bastalǵaly beri avtobýstar lyq toly. Qalta urylary osy kezde kóbeıedi. Qundy zattardy kıimniń ishki qaltasyna salý kerek nemese qolǵa ustaǵan durys», - dep málim etti polıtseıler.
