Almatyda polıtseılerden aqsha bopsalaǵan er adam ustaldy

ALMATY. QazAqparat - Almaty turǵyny patrýldik polıtsııa qyzmetkerlerinen aqsha bopsalaımyn dep ustaldy. Kúdikti ózin blogermin dep tanystyrǵan, dep habarlaıdy QazAqparat tilshisi.

Almaty qalalyq Polıtsııa departamentiniń málimetinshe, 34 jastaǵy B. esimdi er adam ózin patrýldik polıtsııa qyzmetkerlerine bloger retinde tanystyryp, arandatýshylyqtar jasamaýǵa jáne jelide vıdeo ornalastyrmaýǵa ýáde berip, aqsha bopsalaýmen aınalysqan.

«Aqsha somasy 50-den 200 myń teńgege deıingi aralyqta boldy. Bul júrgizilgen jedel jáne arnaıy is-sharalardyń nátıjesinde rastaldy. Kúdiktini qamaýǵa alý qalanyń Áýezov aýdanynda, suratqan $ 300 alyp jatqan kezde júzege asyryldy. Zattaı dáleldemeler tárkilendi jáne QR QK-niń 194-baby 2-bólimi boıynsha qylmystyq is materıaldaryna qosa tirkeldi,» – dedi Almaty qalasy Polıtsııa departamenti bastyǵynyń orynbasary Rýstam Ábdrahmanov.

Kúdikti ýaqytsha ustaý ızolıatoryna qamaldy. Atalǵan fakt boıynsha Polıtsııa departamentiniń Tergeý basqarmasy tergeý sharalaryn júrgizip jatyr.