Almatyda polıtseıler «Ortasha jyldamdyq» baǵdarlamasyn iske qospaq
ALMATY. QazAqparat - Jyldyń sońyna qaraı Almaty joldarynda jyldamdyqty shamadan tys arttyrǵan júrgizýshilerdi anyqtaıtyn arnaıy baǵdarlama iske qosylady. Bul týraly Almaty ІІD bastyǵy Serik Kúdebaev ІT-ındýstrııa ókilderimen kezdesýde aıtty.
«Qaýipsizdikti tsıfrlandyrý» taqyrybymen ótken sharada ІІD basshysy endi koreıalyq tájirıbe paıdalanylatynyn jetkizdi.
«Eń kóp jol-kólik oqıǵasy Almatyda bolady. Biz «Ortasha jyldamdyq» arnaıy baǵdarlamasyn iske qosamyz. Bul - Koreıa tájirıbesi. Buǵan deıin júrgizýshiler kameraǵa jaqyndaǵanda ǵana jyldamdyqty azaıtyp, odan ótken soń qaıta arttyratyn, ıaǵnı qaı jerde qalaı júrý kerek ekenin biletin. Jańa júıeni Shyǵys aınalma joly men ál-Farabı dańǵylynyń 10 ýchaskesinde paıdalanyp jatyrmyz. 2 aıda 400 myń ereje buzý deregin anyqtap, jalpy 200 mln teńge mólsherinde aıyppul salyndy. Taldaýlarǵa qaraǵanda, jyldamdyqty 1 kılometr/saǵatqa azaıtý jol apatyn 3%-ǵa qysqartý múmkindigin beredi», - deıdi S. Kúdebaev.
Onyń aıtýynsha, jyldyń sońyna qaraı avtobýstar arnaıy jolaqpen júrgen kólikterdi anyqtaıtyn vıdeokameralarmen jabdyqtalady. Olardy satyp alý úshin tender ótkizilip jatyr. Olardy jeltoqsannyń aıaǵyna deıin qoǵamdyq kólikke ornatý josparlanýda.
