Almatyda polıtseıler kólikterdiń birin tekserý kezinde granata taýyp aldy
ALMATY. QazAqparat - Almaty polıtsııasy kólikterdiń birinen áskerı qarý tárkiledi, dep habarlaıdy QazAqparat tilshisi.
Qalalyq polıtsııanyń habarlaýynsha, kúdiktilerdi «Boran-154» ekıpajy ustap alǵan.
«Bizdiń polıtsııa Toraıǵyrov kóshesinde kúdik týǵyzǵan «Mıtsýbısı» kóligin toqtatqan. Salonda bolǵan eki er adam bizdi qashyqta ustaýǵa tyrysqan. Kólikti tekserý týraly usynys aıtylǵanda, júrgizýshi qasha jónelgen. Qashyp bara jatyp, olardyń bireýi ózenge barsetkaǵa uqsas zat laqtyryp jiberdi. Men ol jerdi shamamen jadymda saqtap qaldym da, qashqynnyń izine tústim. Kúdiktini ustap kólikke otyrǵyzdyq. Sosyn ózen jaqtan laqtyrylǵan zatty taýyp keldim. Іshinde eki travmatıkalyq tapansha bar bolyp shyqty. Kóliktiń bagajynda basqa kóliktiń memlekettik nómiri tabyldy», - dedi Jol patrýl polıtsııasynyń ınspektory Baýyrjan Jeksenbıev.
Ustalǵandar Bostandyq aýdandyq Polıtsııa departamentine jetkizildi. Tárkilengen qarýlar ballıstıkalyq saraptamaǵa jiberildi.
«Dál osy túni Áýezov aýdany terrıtorııasynda «Boran-086» polıtsııa ekıpajy kúdik týǵyzǵan «Mersedes Bents-180» kóligin teksermek bolǵan. Bul kóliktiń aldynda memlekettik nómiri bolmaǵan. Tekserý kezinde kóliktiń salonynan granataǵa uqsas zat tabyldy. Oqıǵa ornyna Áýezov aýdandyq polıtsııa basqarmasynyń ókilderi keldi. Kólik qorshaldy. Saperler toby oqytý maqsatyndaǵy tartqyshy joq F-1 granatasyn taýyp alǵan. Atalǵan derek boıynsha QR QK 287-babynyń 3-bólimimen sotqa deıingi tergeý isi reestrine tirkeldi", - dedi Jol patrýl polıtsııasy polkiniń komandıri Manap Sattarov.
Qalalyq polıtsııa 2019 jyldyń 10 sáýirinen bastap halyqtyń arasyndaǵy áskerı qarýdy satyp alý naýqanynyń bastalatynyn eskertti.
Illıýstratsııalyq foto
